გაერთიანებულ სამეფოში ინფლაცია მარგარეტ ტეტჩერის პრემიერ- მინისტრობის შემდეგ ყველაზე მეტად გაიზარდა და 40-წლიან მაქსიმუმზეა. ფასების რეკორდული ზრდა მთავრობასა და ცენტრალურ ბანკზე ზეწოლას ზრდის.
ეროვნული სტატისტიკის ოფისის მიხედვით, სამომხმარებლო ფასები აპრილამდე წლიურად 9%-ით გაიზარდა, რაც ყველაზე სწრაფი ტემპია 1982 წლის მარტის შემდეგ. ანგარიში, რომელიც ოთხშაბათს გამოქვეყნდა, ქვეყნის ცხოვრების სტანდარტებისთვის ბნელ მომენტს აღნიშნავს.
მარტის 7%-დან ნახტომი ენერგიის ფასების ზრდამ გამოიწვია, რაც საბითუმო ბაზრებზე აისახა და სამომხმარებლო გადასახადები აპრილში 54%-ით გაზარდა. უკრაინის ომის შემდეგ, გასულ თვეში ფასები ასევე რეკორდულად გაიზარდა როგორც ბენზინზე, ასევე დიზელზე.
ინფლაციის ტემპი ორჯერ აღემატება საბაზისო ხელფასების ზრდის ტემპს, რაც მომხმარებელთა ხარჯვის ძალას ამცირებს. სიტუაცია, სავარაუდოდ, კიდევ უფრო დამძიმდება. ინგლისის ბანკი ორნიშნა ინფლაციას ვარაუდობს ოქტომბრისთვის, როცა ენერგიის გადასახადები კვლავ აიწევს.
ინფლაციის მკვეთრი ზრდა ხაზს უსვამს დამაბალანსებელი აქტის სირთულეს, რომლის წინაშეც გაერთიანებული სამეფოს ცენტრალური ბანკია. ბანკი ინფლაციის შესაკავებლად რეფინანსირების განაკვეთს ზრდის მაშინ, როცა რეცესიის რისკი იზრდება. მთავრობის მიერ გადასახადების ზრდის ფონზე, ზეწოლა იზრდება ფინანსთა სამინისტროზეც, რომ მოსახლეობის დასახმარებლად ზომები მიიღონ.
ბრიტანელი მომხმარებლები ახლა ცხოვრების სტანდარტის მხრივ ისტორიაში ყველაზე უარეს პერიოდს განიცდიან. 50 წლის განმავლობაში ყველაზე დაბალი უმუშევრობის დონის მიუხედავად, 250,000-ზე მეტი შინამეურნეობა სიღარიბეში აღმოჩნდა. Bloomberg Economics-ის მიხედვით, ინფლაცია საშუალო ბრიტანული შინამეურნეობის გადასახადებს წელს £2,400-ით გაზრდის.
ცენტრალურმა ბანკმა მიმდინარე თვეში ზედიზედ მეოთხეჯერ გაზარდა რეფინანსირების განაკვეთი. თუმცა, ეკონომისტები ზაფხულში კიდევ ორ 25 საბაზისო პუნქტიან ზრდას ელიან, სანამ ზრდის პოლიტიკა საბოლოოდ შეჩერდება.
Bloomberg-ის ორიგინალური სტატიის ავტორი: ენდრიუ ატკინსონი