ერთი წელია საქართველოში ორნიშნა ინფლაცია ფიქსირდება, რომელიც ეროვნული ბანკის მიზნობრივ, 3%-იან მაჩვენებელს მნიშვნელოვნად აჭარბებს. საქსტატის მიერ დღეს გამოქვეყნებული მონაცემებით, ივნისში წლიურმა ინფლაციამ 12.8% შეადგინა.
სამომხმარებლო ფასების ზრდის მთავარი მიზეზი კვლავ გაძვირებული სურსათია. ივნისში სურსათისა და უალკოჰოლო სასმელების ჯგუფში ფასები წლიურად 21.8%-ით გაიზარდა. აღსანიშნავია, რომ სურსათის გაძვირება მოსახლეობაზე ორნიშნა ინფლაციიდან მომდინარე წნეხს მნიშვნელოვნად ზრდის, რამდენადაც ოჯახების ყოველთვიური ხარჯების უდიდესი წილი, 44% სწორედ სურსათზე მოდის.
საქსტატის მონაცემებით, მიმდინარე წლის ივნისში, გასული წლის ანალოგიურ პერიოდთან შედარებით, ყველაზე მეტად შემდეგი 10 პროდუქტი გაძვირდა:
- ქლიავი - ფასი გაიზარდა 120%-ით;
- ყურძენი - 87%;
- მწვანე ლობიო - 73%;
- ატამი - 69%;
- საზამთრო - 60%;
- სიმინდის ფქვილი - 54%;
- დიზელის საწვავი - 53%;
- მარგარინი - 53%;
- კარტოფილი - 47%;
- პომიდორი - 46%.
ბოლო ერთ წელში ყველაზე მეტად შემდეგი 10 პროდუქტი გაიაფდა:
- ქალის ქვედაკაბა - ფასი შემცირდა 21%-ით;
- მამაკაცის შარვალი - 20%;
- კომპიუტერი - 15%;
- მამაკაცის ფეხსაცმელი - 11%;
- ფოტოაპარატი - 10%;
- სტაფილო - 10%;
- ქალის შარვალი - 9%;
- ლიმონი - 8%;
- ქალის საზაფხულო კაბა - 8%;
- ტკივილგამაყუჩებელი მედიკამენტები - 7%.