LIVE

GMP და GDP სტანდარტები ფარმაცევტული კომპანიებისთვის 2022 წლიდან ამოქმედდება

29 სექ 202116:15
3 წუთის საკითხავი
clock clock 534
GMP და GDP სტანდარტები ფარმაცევტული კომპანიებისთვის 2022 წლიდან ამოქმედდება

ჯანდაცვის სამინისტრო გადაწყვეტილებას არ ცვლის და ფარმაცევტული კომპანიებისთვის GMP და GDP სტანდარტების დაცვის მოთხოვნის ამოქმედებას 2022 წლის იანვრიდან გეგმავს.

ახალ სტანდარტზე გადასვლის გეგმა სექტორის წარმომადგენლებმა ჯანდაცვის მინისტრ ეკატერინე ტიკარაძეს დღეს გააცნეს. სამინისტროს მიერ გავრცელებული ინფორმაციით, მინისტრმა განმარტა, რომ აღნიშნულ სტანდარტზე გადასვლა მკვეთრად გააუმჯობესებს საქართველოში წარმოებული მედიკამენტების ხარისხს, რაც ასევე ქვეყნის საექსპორტო პოტენციალზეც აისახება.

„მრავალწლიანი გამოცდილება გვიჩვენებს, თუ რამდენად მნიშვნელოვანია ხარისხიანი წამალი, ხარისხიანი წამლის მიწოდება და მიწოდების პროცესის სწორი ზედამხედველობა. მაშინ, როდესაც ბევრი პოსტსაბჭოთა ქვეყანა აღნიშნულ სტანდარტზე 2014, ასევე 2019 წლებში გადავიდა, მნიშვნელოვანი არის, რომ ქართულმა ბიზნესმაც არ დაკარგოს მისი საექსპორტო წილი. შესაბამისად მნიშვნელოვანია რაც შეიძლება სწრაფი ნაბიჯებით და უსაფრთხოდ გადავიდეთ ჩვენც ამ სტანდარტზე“,- განაცხადა ტიკარაძემ.

შეხვედრაზე მხარეები შეთანხმდნენ, რომ შეიქმნება სამუშაო ჯგუფი, რომელიც ახალ GMP და GDP სტანდარტზე გადასვლის ტექნიკურ საკითხებს განიხილავს.

GMP საერთაშორისო სტანდარტზე გადასვლა 2016 წლიდან იგეგმებოდა, თუმცა სისტემის დანერგვა, ფარმაცევტული დაწესებულებების თხოვნითა და მათთვის მოსამზადებელი პერიოდის გახანგრძლივების მიზნით ჯერ 2018 წლის პირველ იანვრამდე გადაიდო, მოგვიანებით კი, 2019 წლის პირველი ივლისიდან 2022
წლის პირველ იანვრამდე გარდამავალი პერიოდი განისაზღვრა. კარგი საწარმოო და სადისტრიბუციო პრაქტიკის სტანდარტის დანერგვა 2022 წლის პირველი იანვრიდან გახდება სავალდებულო. ჯანდაცვის სამინისტროს ინფორმაციით, GMP/GDP-ის დანერგვით საქართველო აღიარებს ევროკავშირის სტანდარტებს ფარმაცევტული პროდუქტების ხარისხის კონტროლის მიმართულებით.