ინდოეთმა კორონავირუსის ვაქცინის ადგილობრივ მწარმოებელს 300 მილიონი დოზა შეუკვეთა. ეს გადაწყვეტილება მთავრობამ მას შემდეგ მიიღო, რაც ქვეყნის უზენაესმა სასამართლომ პრემიერ-მინისტრის, ნარენდრა მოდის კაბინეტს მოსახლეობის ვაქცინაციით უზრუნველყოფა მოსთხოვა.
ცნობილია, რომ ჰაიდარაბადში მდებარე კომპანია Biological-E 15 მილიარდ რუპიას ($205 მილიონი) ავანსის სახით მიიღებს. მისი ვაქცინის კვლევა ამჟამად მე-3 ეტაპზეა. კომპანიის გეგმით, ვაქცინები აგვისტოდან დეკემბრამდე მზად იქნება.
მიმდინარე კვირაში უზენაესმა სასამართლომ მოდის ადმინისტრაციას მოსთხოვა შეემუშავებინა ვაქცინაციის პოლიტიკა, რომლის მიხედვითაც ვაქცინა ყველასთვის ხელმისაწვდომი იქნებოდა და ღარიბებს დაიცავდა.
Biological-E ვაქცინას ბეილორის სამედიცინო კოლეჯთან თანამშრომლობით ამუშავებს. გასულ წელს კომპანიამ თქვა, რომ ვაქცინის ორი დოზა 28 დღის ინტერვალით გაკეთდება.
ვაქცინის დეფიციტის გამო, არსებული ტემპით, ინდოეთს მოსახლეობის 75%-ის ვაქცინაციისთვის დაახლოებით ორი წელი დასჭირდება, თუმცა მთავრობა პირობას დებს, რომ 2021 წლის ბოლომდე ყველა ინდოელი აიცრება.
Bloomberg-ის ორიგინალური სტატია