გიგანტურმა კომპანიებმა 120 000-ზე მეტი თანამშრომელი გაათავისუფლეს. ეს რიცხვები კვლავ იზრდება.
კომპიუტერებისა და პრინტერების მწარმოებელმა HP-მა განაცხადა, რომ მომდევნო სამი წლის განმავლობაში, 4000-დან 6000-მდე თანამშრომლის გათავისუფლებას გეგმავს, რაც მისი დასაქმებულების რიცხვის 10%-ს უდრის. გადაწყვეტილების მიზეზი გლობალურად გაუარესებული ეკონომიკური მდგომარეობის ფონზე, ტექნიკის გაყიდვების შემცირებაა.
კომპანიის განცხადებით, მიმდინარე წლის მეოთხე კვარტლის შემოსავალი, გასული წლის ანალოგიურ პერიოდთან შედარებით, 11.2%-ით შემცირდა და $14.8 მილიარდი შეადგინა.
თანამშრომლებს მასშტაბურად ამცირებენ სხვა მსხვილი ტექნოლოგიური კომპანიებიც. Amazon-მა, რომელმაც გასულ კვირას 260 თანამშრომელი გაათავისუფლა, მომავალ წელს ათასობით ადამიანის დათხოვნას გეგმავს. მედიის ინფორმაციით, ელექტრონული ვაჭრობის გიგანტი ჯამში 10000-მდე თანამშრომელს გაათავისუფლებს.
მიმდინარე თვის დასაწყისში Facebook-ის მშობელმა კომპანია Meta-მ დასაქმებულების 13%-იანი შემცირება დააანონსა. კომპანია აპირებს, რომ ჯამში, მსოფლიოს მასშტაბით, 87,000 თანამშრომლიდან 11,000 დაითხოვოს სამსახურიდან. Meta-ს აღმასრულებელი დირექტორის, მარკ ცუკერბერგის განცხადებით, დაანონსებული შემცირება "Meta-ს ისტორიაში ერთ-ერთი ყველაზე მძიმე ცვლილებაა".
ამავდროულად, Twitter-მა თანამშრომელთა ნახევარზე მეტი გაათავისუფლა. მედიაში ასევე გავრცელდა ინფორმაცია, რომ კომპანია კიდევ უფრო მეტის დათხოვნას აპირებდა, თუმცა გავრცელებული ცნობები გუშინ Twitter-ის აღმასრულებელმა დირექტორმა, ილონ მასკმა უარყო.
გასულ თვეში, Microsoft-მა განაცხადა, რომ რამდენიმე განყოფილებაში თანამშრომლებს ამცირებს.
თანამშრომლების შემცირებას კომპანიები გაუარესებული მაკროეკონომიკური გარემოთი, მაღალი ინფლაციით, გამკაცრებული მონეტარული პოლიტიკით და გლობალური რეცესიის შიშით ხსნიან.