პრემიერ-მინისტრმა ირაკლი ღარიბაშვილმა ეკონომიკური საბჭოს წევრებს „ბორჯომის“ შესახებ კონკრეტული დავალებები მისცა.
კერძოდ, მთავრობის ადმინისტრაციის ინფორმაციით, ეკონომიკური საბჭოს სხდომაზე ყურადღება გამახვილდა კომპანია „ბორჯომის“ შეთავაზებაზე, მაკონტროლებელი კომპანიის მიერ საქართველოს მთავრობისთვის აქციების უსასყიდლოდ გადაცემის თაობაზე. პრემიერ-მინისტრმა სამინისტროებს დაავალა აქტიურად იმუშაონ, რათა შესაბამისი პროცედურები მოკლე ვადებში დასრულდეს. მიღებული გადაწყვეტილების შესახებ მთავრობის უახლოეს სხდომაზე გახდება ცნობილი.
რაც შეეხება საბჭოზე განხილულ სხვა საკითხებს, მთავრობის ადმინისტრაციის ინფორმაციით, ეკონომიკური საბჭოს წევრებმა ღარიბაშვილს მიაწოდეს ინფორმაცია საზოგადოებრივი დასაქმების პროგრამის მიმდინარეობის შესახებ. პროგრამასთან დაკავშირებით ჯანდაცვის სამინისტროს 28 680-მა მოქალაქემ მიმართა, აქედან 12 502 ვაკანსიაზე გადამისამართდა.
"პრემიერმა მთავრობის ადმინისტრაციის რეგიონებთან ურთიერთობის დეპარტამენტის უფროსს ლერი ბარნაბიშვილს დაავალა გააძლიეროს კოორდინაცია მუნიციპალიტეტების მერებთან, რათა მათ აქტიური ჩართულობით ხელი შეუწყონ პროგრამის წარმატებით განხორციელებას.
ასევე, განიხილეს ეკონომიკური ზრდის პოზიტიური მაჩვენებლები და ტურიზმის აღდგენის მზარდი დინამიკა. აღინიშნა, რომ კვირაში დაგეგმილია 400-ზე მეტი ავიარეისი. რაც შეეხება აჭარის რეგიონს, ტურისტული აქტივობა იქაც მზარდი ტემპით ხასიათდება. რეგიონში თვეში 220-ზე მეტი ავიარეისი შესრულდება.
ამასთან, სხდომაზე დადებითად შეფასდა თურქეთიდან იმპორტირებული იაფი მედიკამენტების რეალიზაციის პროცესი. 10 კვირის მონაცემებით ხელმისაწვდომი მედიკამენტებით 150 000-ზე მეტმა ადამიანმა ისარგებლა და ჯამში, მოსახლეობამ 42 მილიონი ლარი დაზოგა.
„IDS ბორჯომმა“ 29 აპრილიდან წარმოება დროებით შეაჩერა. კომპანიამ გადაწყვეტილების მიზეზად ომის გამო პროდუქციის რეალიზაციის გართულება და ასევე, საბანკო ანგარიშებზე შეზღუდული წვდომა დაასახელა.
„IDS ბორჯომის“ საკონტროლო პაკეტი Alfa Group-მა 2013 წელს იყიდა. Alfa Group-ის დამფუძნებელი სანქცირებული რუსი მილიარდერი მიხაილ ფრიდმანია.