ევროკავშირი რუსეთის პრეზიდენტის, ვლადიმერ პუტინის ქალიშვილებისთვის სანქციების დაწესებას განიხილავს. ამის შესახებ Bloomberg საკითხში გარკვეულ პირებზე დაყრდნობით წერს.
ევროკომისიის მიერ ბლოკის წევრებისთვის შეთავაზებული სანქციების პაკეტში ათობით ადამიანი შედის, მათ შორის არიან პოლიტიკური ფიგურები, მაგნატები და მათი ოჯახის წევრები და ასევე, კრემლის რამდენიმე პროპაგანდისტი.
პუტინის ქალიშვილებისადმი, კატერინასა და მარიას მიმართ სანქციების დაწესება ძირითადად სიმბოლური ნაბიჯია, რადგან გაურკვეველია, ფლობენ თუ არა ისინი მნიშვნელოვან აქტივებს რუსეთის ფარგლებს გარეთ.
პუტინის ქალიშვილების ცხოვრება საიდუმლოებით არის მოცული, მათ სხვადასხვა გვარი აქვთ. კრემლს არასოდეს დაუდასტურებია პუტინის ქალიშვილების სახელები და არ გაუვრცელებია მათი სრულწლოვნების პერიოდში გადაღებული ფოტოები.
2015 წელს პუტინმა ქალიშვილების შესახებ რამდენიმე დეტალი გაამჟღავნა. მათ შორის, აღნიშნა, რომ ორივემ დაამთავრა რუსული უნივერსიტეტები და საუბრობენ არაერთ ენაზე.
36 წლის მარია ვორონცოვა Nomenko-ს თანამფლობელია. 37 წლის კატერინა ტიხონოვა კი მოსკოვის სახელმწიფო უნივერსიტეტის ხელოვნური ინტელექტის ინსტიტუტს მართავს.
კრემლის სპიკერმა დმიტრი პესკოვმა თქვა, რომ მას სანქციების პროექტის შესახებ ინფორმაცია არ აქვს და დაელოდება ოფიციალურად გამოქვეყნებულ სიახლეს.
ევროკავშირი სანქციების მე-5 პაკეტის დაწესებას გეგმავს. ამჯერად შეზღუდვები შეეხება თავდაცვითი სექტორის ათზე მეტ სუბიექტსა და ოთხ ბანკს, რომლებიც გლობალური გადახდების სისტემა SWIFT-დან გათიშულია, მაგრამ მათზე სანქციები სრულად არ ამუშავებულა. მათ შორისაა VTB ბანკი. ევროკომისია ქვეყნებს რუსული ნახშირის იმპორტის აკრძალვასაც სთავაზობს.
Bloomberg-ის ორიგინალური სტატიის ავტორები: ალბერტო ნარდელი და ჯონ ფოლენი