აშშ-ის "სურსათისა და წამლის ადმინისტრაციამ" (FDA) COVID-19-ის სამკურნალოდ ანტივირუსული აბი "პაქსლოვიდი" დაამტკიცა. Pfizer-ის მიერ წარმოებული პრეპარატი, პირველი საშუალებაა, რომლითაც 12+ პაციენტებს მკურნალობა სახლში შეეძლებათ.
ვარაუდობენ, რომ "პაქსლოვიდი" წარმოების დაწყებისთანავე გახდება ძლიერი იარაღი ვირუსთან საბრძოლველად. პრეპარატი დაავადების მძიმე გართულებების მაღალი რისკის მქონე ადამიანებს ჰოსპიტალიზაციისგან დაიცავს.
მასშტაბურ კლინიკურ კვლევაში მაღალი რისკის მქონე არავაქცინირებულ პაციენტებში პრეპარატმა ჰოსპიტალიზაციის მაჩვენებელი 88%-ით შეამცირა.
„ავტორიზაცია Covid-19-თან საბრძოლველად პანდემიის გადამწყვეტ მომენტში ახალ ინსტრუმენტს იძლევა მაშინ, როდესაც ახალი ვარიანტები ჩნდება“,- თქვა აშშ-ის "სურსათისა და წამლების ადმინისტრაციის" წამლების შეფასებისა და კვლევის ცენტრის დირექტორმა, პატრიცია კავაცონმა.
პრეპარატის დამტკიცებას გამოეხმაურა აშშ-ის პრეზიდენტი ჯო ბაიდენი, რომელმაც განაცხადა, რომ საჭიროების შემთხვევაში, ფედერალური მთავრობა გამოიყენებს თავის უფლებამოსილებას, რათა დაეხმაროს Pfizer-ს, გაზარდოს აბების წარმოება.
„უფრო გადამდები ომიკრონის ვარიანტის პირობებშიც კი, ამერიკა ვირუსთან საბრძოლველად უფრო მზადაა, ვიდრე ოდესმე“,- თქვა ბაიდენმა.
სიახლის შემდეგ Pfizer-ის აქციები ნიუ-იორკში 1%-ით გაიზარდა. მიმდინარე წელს კომპანიამ 61%-იანი ზრდა აჩვენა.
საერთაშორისო გამოცემები საკუთარ წყაროებზე დაყრდნობით წერენ, რომ ავტორიზაციას მალე Merck-ის წარმოების ანტივირუსული აბიც მიიღებს. გასულ თვეს დიდი ბრიტანეთი გახდა პირველი ქვეყანა, რომელმაც Merck-ის Covid-19-ის ანტივირუსული აბი დაამტკიცა. ქვეყნის წამლების მარეგულირებელი მიიჩნევს, რომ სამკურნალო საშუალება უსაფრთხო და ეფექტურია.
Bloomberg-ის ორიგინალური სტატიის ავტორი: ჯოშ ვინგროვი, ჯენიფერ ჯეიკობსი და რობერტ ლანგრეტი