თიბისი კაპიტალი მიიჩნევს, რომ სასაქონლო პროდუქციის ფასების მკვეთრი კლება მოლოდინების გადახედვის საფუძველია.
საინვესტიციო ბანკის პროგნოზი, რომლის მიხედვით, წლის ბოლოს ინფლაცია 6%-ს მიაღწევდა, ბრენტის ტიპის ნავთობის ფასს დეკემბრისთვის 80-85 აშშ დოლარის დიაპაზონში მოიაზრებდა, რისკის პრემიის გარკვეულწილად მაღალ დონეზე შენარჩუნების დაშვების ფონზე. თუმცა, ბაზრების ოპტიმიზმის პარალელურად, რისკის პრემია მკვეთრად შემცირდა.
"საწვავის ადგილობრივი ფასები გლობალურ ბაზრებზე ცვლილებაზე მხოლოდ მცირედი ჩამორჩენით რეაგირებს. 29 ივნისის მდგომარეობით, მსხვილ სადგურებში ბენზინის ფასი ჯერჯერობით არ შეცვლილა, ხოლო დიზელის შემთხვევაში გარკვეულწილად კლება ფიქსირდება. თუ ბირჟაზე ვითარება არ შეიცვალა, მოსალოდნელია, რომ ივლისიდან ბენზინის ფასები შემცირებას დაიწყებს," ნათქვამია თიბისი კაპიტალის მიმოხილვაში.
რაც შეეხება სურსათს, მიუხედავად სასუქების ფასის კლებისა, ფასები შარშანდელ პერიოდთან შედარებით ჯერ კიდევ მაღალ ნიშნულზე რჩება და თიბისი კაპიტალი ასევე ვარაუდობს, რომ ბოლო თვეებში გაძვირებული სასუქების გამოყენება საკვების ფასებში მომდევნო თვეებში აისახება.
"ამინდის მკვეთრი ცვალებადობის გათვალისწინებითაც, სურსათის ინფლაციის კუთხით სურათი ნაკლებად გამოკვეთილია, თუმცა, მოსალოდნელია, რომ წინა დაშვებებთან შედარებით ფასებზე ზეწოლა შედარებით სუსტი იქნება. საერთო ჯამში, თიბისი კაპიტალის პროგნოზით, წლის ბოლოს ინფლაცია 5.1%-ს მიაღწევს, იმ დაშვებით, რომ კონფლიქტის ესკალაცია აღარ მოხდება და ბრენტის ტიპის ნავთობი დეკემბრისთვის, დაახლოებით, 70 აშშ დოლარი ეღირება," ვკითხულობთ ეკონომიკურ განახლებაში.
მიუხედავად ინფლაციის პროგნოზის შერბილებისა, თიბისი კაპიტალი წლის ბოლოს $/₾ გაცვლითი კურსის პროგნოზს 2.60-2.65-ის ფარგლებში ინარჩუნებს, რასაც ორი ძირითადი ფაქტორი განაპირობებს. პირველი, 2026 წელს შედარებით გამკაცრებული მონეტარული პოლიტიკის შენარჩუნებაა მოსალოდნელი. ამასთან, გასულ თვეებში, ინფლაციის ზრდის პარალელურად, ლარი მხოლოდ მცირედით გამყარდა.
მეორე, უცხოური ვალუტის ბაზარზე კვლავ სიჭარბე ფიქსირდება, რაც მიმდინარე პერიოდში ლარის ძირითადი მხარდამჭერი ფაქტორია. თიბისი კაპიტალის შეფასებით, სავალუტო ბაზარზე სიჭარბე ივნისშიც ნარჩუნდება და ეს საყურადღებოა საბანკო სექტორისთვისაც: "მიმდინარე წელს უცხოური ვალუტის დეპოზიტების ზრდას თან არ ახლავს ლარის დეპოზიტების კლება, რაც მიუთითებს, რომ ძირითადი ფაქტორი არა კონვერტაციები, არამედ წმინდა სავალუტო შემოდინებებია, ჩვენი შეფასებით, ერთჯერადი ფაქტორების გარეშე, ეს ტენდენცია ივნისშიც ნარჩუნდება."
პუბლიკაციაში ასევე აღნიშნულია, რომ ივნისში როგორც რეზიდენტების, ასევე არარეზიდენტების დანახარჯებში, მაისთან შედარებით, ჯერჯერობით გარკვეული შენელება იკვეთება.