Red Bull-ის ავსტრალიელი ინვესტორის მემკვიდრემ, მარკ მატეშიცმა კომპანიის გადაბარების შემდეგ პირველად, €582 მილიონის დივიდენდი მიიღო.
აღსანიშნავია, რომ ავსტრიელი ინვესტორისთვის ეს ყველაზე დაბალი დივიდენდია ბოლო სამი წლის განმავლობაში, რაც გასული წლის მოგების შეფერხებას ნათლად წარმოაჩენს. მარკეტინგსა და წარმოებაში გაზრდილმა ხარჯებმა კომპანიის 24%-იანი შემოსავლების ზრდა გადაფარა და წმინდა მოგება შეანელა.
მიუხედავად ამისა, გასულ წელს კომპანიამ მაინც შეძლო €1.56 მილიარდიანი მოგების ნახევარი აქციონერებს შორის გადაენაწილებინა. მატეშიცს, რომელიც კომპანიის 49%-იან წილს ფლობს, €383 მილიონი ერგო. კომპანიის წილების 51% ტაილანდელ, იოვიდიას ოჯახს ეკუთვნის.
კომპანიის მრავალწლიანი ტრადიციის მიხედვით, რაც ავსტრიული მფლობელებისთვის წილობრივად უფრო მეტის გადახდას გულისხმობს, მარკ მატეშიცმა კუთვნილ თანხაზე €199 მილიონით მეტი მიიღო. ტაილანდელ მეწილეს, ჩალერმ იოვიდიას კი დამატებით €3.17 მილიონი გადაუხადეს.
მატეშიცმა კომპანია 2022 წელს, მამის გარდაცვალების შემდეგ გადაიბარა. მან ახალი მენეჯმენტი დანიშნა. მაგალითად, სტრატეგიული ინიციატივების მიმართულება Red Bull-ი საფეხბურთო კლუბის ყოფილ ხელმძღვანელს, ოლივერ მინცლაიფს ჩააბარა.
აღსანიშნავია ისიც, რომ მატეშიცმა კომპანიის გადაბარების შემდეგ, Forbes-ის ახალგაზრდა მილიარდერებს შორის, $34,7 მილიარდიანი ქონებით, პირველი ადგილი დაიკავა. ამჟამად, 31 წლის მატეშიცი მილიარდერთა გრძელ სიაში 37-ე ადგილს იკავებს.
Red Bull-ი წმინდა ბრუნვის თითქმის მეოთხედს მარკეტინგულ ინიციატივებზე ხარჯავს. კომპანია ფლობს ფორმულა 1-ის გუნდს, მასპინძლობს ექსტრემალური სპორტის ღონისძიებებს და სპონსორობას უწევს ისეთ წამყვან სპორტსმენებს, როგორებიცაა ბრაზილიელი ფეხბურთელი ნეიმარი და ალპური სათხილამურო მრბოლელი, ლინდსი ვონი. გასულ წელს Red Bull-ის სპონსორობისთვის გაწეულმა ხარჯებმა €1 მილიარდს გადააჭარბა.