ჩინეთის პრეზიდენტი, სი ძინპინი ვნუკოვოს აეროპორტში ცოტა ხნის წინ ჩავიდა. ამის შესახებ BBC რუსულ სააგენტო TASS-ზე დაყრდნობით წერს.
მედიის ინფორმაციით, ის დღეს რუსეთის პრეზიდენტთან, ვლადიმერ პუტინთან ისადილებს, შემდეგ კი პირისპირ არაფორმალურ შეხვედრას გამართავს.
კრემლის პრესსპიკერის, დიმიტრი პესკოვის თქმით, შეხვედრა იქნება "არაფორმალური, მაგრამ ძალიან მნიშვნელოვანი".
დელეგაციების მონაწილეობით ოფიციალური მოლაპარაკებები ხვალ იგეგმება.
პეკინის შეფასებით, ეს არის ვიზიტი "მეგობრობისა და მშვიდობისთვის", ხოლო რუსეთმა განაცხადა, რომ ლიდერები განიხილავენ "ყოვლისმომცველ პარტნიორობასა და სტრატეგიულ თანამშრომლობას".
Financial Times-ის ცნობით, მოსკოვში ვიზიტისა და რუსეთის პრეზიდენტ ვლადიმერ პუტინთან შეხვედრის შემდეგ, ჩინეთის ლიდერი, სი ძინპინი უკრაინის პრეზიდენტ ვოლოდიმირ ზელენსკისთან სატელეფონო საუბარს გეგმავს.
სი ძინპინის თანამდებობაზე მესამე ვადით არჩევის შემდეგ, ეს მისი პირველი საერთაშორისო ვიზიტია.