საქართველოში მოქმედ 32 ფარმაცევტულ საწარმოსა და 190 სამკურნალო საშუალებათა საბითუმო რეალიზატორს საქმიანობა შეუჩერდა. ამასთან, 95 ავტორიზებულ აფთიაქს შეუჩერდა მედიკამენტების საბითუმო რეალიზების უფლება.
ფარმაცევტული საწარმოებისთვის საქმიანობის აკრძალვის მიზეზი კარგი საწარმოო პრაქტიკის (GMP) სტანდარტის შეუსრულებლობაა. აფთიაქებისა და საბითუმო რეალიზატორების შემთხვევაში კი კარგი სადისტრიბუციო პრაქტიკის (GDP) სტანდარტის შეუსრულებლობა.
სამედიცინო და ფარმაცევტული საქმიანობის რეგულირების სააგენტომ კომპანიების ჩამონათვალი გამოაქვეყნა და განმარტა, რომ იურიდიულ პირებს ფარმაცევტული საქმიანობა „ფარმაკოლოგიურ საშუალებათა კლინიკური კვლევის, ფარმაცევტული წარმოების, ავტორიზებული აფთიაქის, სპეციალურ კონტროლს დაქვემდებარებულ სამკურნალო საშუალებათა იმპორტის ან ექსპორტის ნებართვების გაცემის წესისა და პირობების დამტკიცების თაობაზე“ საქართველოს მთავრობის 2019 წლის 16 ივლისის N335 დადგენილების შესაბამისად შეეზღუდათ.