უკრაინაში შეჭრის გამო, EU-მა რუსეთთან დაკავშირებული 35 მილიარდი ევროს აქტივები გაყინა

Bloomberg

რუსეთის მიერ უკრაინაში შეჭრის საპასუხოდ, ევროკავშირის ქვეყნებმა ომის პირველი 5-ნახევარი კვირის განმავლობაში, 35 მილიარდი ევროს ($39 მილიარდი) ღირებულების აქტივები გაყინეს. 

სიაში პირველ ადგილზეა საფრანგეთი, რომლის მიერ გაყინული საქონლისა და კაპიტალის ღირებულება 23,5 მილიარდ ევროს აღწევს. მისი უდიდესი ნაწილი - 22,8 მილიარდი ევრო რუსეთის ცენტრალური ბანკის სახსრებს მოიცავდა.

უკრაინაში შეჭრის შემდეგ, ევროკავშირმა, მოსკოვის ეკონომიკისა და ფინანსური სისტემის იზოლირების მიზნით, რუსეთის ცენტრალურ ბანკთან ყველა ტრანზაქცია აკრძალა. რუსეთი დაახლოებით $640 მილიარდის რეზერვებს ფლობს. 

სიაში საფრანგეთს მოსდევს გერმანია, ევროკავშირის უდიდესი ეკონომიკის მქონე ქვეყანა, რომელმაც ევროკომისიის 5 აპრილის მონაცემებით, 341,600 ევროს ღირებულების აქტივები დააყადაღა. ევროკომისიის შეფასებიდან ერთი კვირის შემდეგ გერმანიამ დააკავა რუსი მილიარდერის ალიშერ უსმანოვის სუპერიახტა Dilbar, რომელიც $600-დან 750 მილიონამდე იყო შეფასებული.

Bloomberg-ის ინფორმაციით, ბელგიამ 10 მილიარდი ევროს ღირებულების აქტივები გაყინა, რაც მოიცავს შვიდი რუსული ბანკის, მათ შორის, VTB Bank-სა და Bank Rossiya-ს SWIFT-დან გათიშვის შედეგებს. 

იტალიის მიერ გაყინული ქონების ჯამური ღირებულება 1,1 მილიარდი ევროა. მასში შედის რუსი ოლიგარქების იახტები და უძრავი ქონება სარდინიასა და ტოსკანაში.

ირლანდიამ 839 მილიონი ევროს აქტივები გაყინა, ნიდერლანდებმა - 516 მილიონი ევროს ღირებულების, ხოლო დანიის მიერ გაყინული ქონება 4195 ევროს შეადგენს. 

ანგარიშის მიხედვით, ევროკავშირის ზოგიერთი ქვეყნის მიერ გაყინული აქტივების შესახებ ინფორმაცია ხელმისაწვდომი არ არის. 

Bloomberg-ის ორიგინალური სტატიის ავტორი: ჯონ ფოლენი