აშშ-ის კანონმდებლები Netflix-ს აფრთხილებენ, შეზღუდოს ახალგაზრდებისთვის თამბაქოსა და ელექტროსიგარეტების მოწევის ამსახველი კადრების ჩვენება.
"მოვუწოდებთ თქვენს კომპანიას, გადადგას უფრო აგრესიული ნაბიჯები, რათა შეზღუდოს ამგვარი კადრები და შეამციროს ახალგაზრდებში ამ მავნე შინაარსის ჩვენება",- წერენ დემოკრატი სენატორები ედ მარკი, კრის ვან ჰოლენი და რიჩარდ ბლუმენტალი Netflix-ისადმი მიწერილ წერილში.
სენატორები წერილში იმოწმებენ საზოგადოებრივი ჯანდაცვის ჯგუფის, Truth Initiative-ს ანგარიშს, სადაც ნათქვამია, რომ გასული ოთხი წლის განმავლობაში, სხვა არხებთან შედარებით, Netflix-მა ახალგაზრდებისთვის გამიზნულ შოუებში მოწევის მეტი სცენა აჩვენა.
ამავე ანგარიშის მიხედვით, Netflix-ის ორ შოუში: 2020 წლის სეზონის The Queen’s Gambit-სა და The Umbrella Academy-ში ნაჩვენებია თამბაქოს ან ელექტროსიგარეტის მოწევის 200-ზე მეტი შემთხვევა.
2019 წელს, Netflix-მა პირობა დადო, რომ მოწევის ამსახველ კადრებს შეამცირებდა, ახალგაზრდა მაყურებლისთვის გამიზნულ შოუებში კი მათზე სრულად იტყოდა უარს.
სენატორები წერენ, რომ ამ ვალდებულების შემდეგ, Netflix-ის მრავალმა პროგრამამ გაზარდა თამბაქოს ამსახველი კადრების რაოდენობა.
მათ კომპანიას სთხოვეს, მიაწოდოს კონკრეტული დეტალები თუ როგორ შეასრულეს პირობა და პასუხისთვის ვადა 21 აპრილამდე მისცეს.
Bloomberg-ის ორიგინალური სტატიის ავტორი: ბროდი ფორდი