ევროკავშირის მარეგულირებელი სავარაუდოდ, Sputnik V-ს წელს არ დაამტკიცებს - მედია

22 ოქტ 202112:30
3 წუთის საკითხავი
clock clock 184
ევროკავშირის მარეგულირებელი სავარაუდოდ, Sputnik V-ს წელს არ დაამტკიცებს - მედია

ევროკავშირის წამლის მარეგულირებელი (EMA) Covid-19-ის საწინააღმდეგო რუსული ვაქცინის Sputnik V-ის დამტკიცების შესახებ გადაწყვეტილებას, სავარაუდოდ, წელს აღარ მიიღებს, რადგან განხილვისათვის საჭირო გარკვეული მონაცემი სააგენტოსთვის ცნობილი ჯერ კიდევ არ არის. ამის შესახებ ინფორმაციას Reuters-ი საკუთარ წყაროზე დაყრდნობით ავრცელებს.

"თუ ნოემბრის ბოლომდე საჭირო მონაცემებს მიიღებს, მაშინ მარეგულირებელმა შეიძლება გადაწყვეტილება მომავალი წლის პირველ კვარტალში მიიღოს",- ამბობს წყარო, რომელსაც საქმის სენსიტიურობიდან გამომდინარე, საინფორმაციო სააგენტო არ ამჟღავნებს.

ევროპის წამლის მარეგულირებელმა რუსული ვაქცინის განხილვა ოფიციალურად მიმდინარე წლის მარტში დაიწყო. მოსალოდნელი იყო, რომ მისი დამტკიცების შესახებ გადაწყვეტილებას სააგენტო მაისში ან ივნისში მიიღებდა. 

თებერვალში სამედიცინო ჟურნალ The Lancet-ში გამოქვეყნებული კლინიკური კვლევის III ფაზის შედეგებმა აჩვენა, რომ ვაქცინა თითქმის 92%-ით ეფექტურია. მოგვიანებით მწარმოებელმა ქვეყანამ თქვა, რომ Sputnik V 83%-ით ეფექტურია დელტა ვარიანტის წინააღმდეგ. 

ვაქცინა ფართოდ გამოიყენება რუსეთში და გამოსაყენებლად დამტკიცებულია 70-ზე მეტ ქვეყანაში. Reuters-ის წყაროს თქმით, მის ეფექტურობასთან და უსაფრთხოებასთან დაკავშირებით ეჭვის საფუძველი არ არსებობს.

ვაქცინა სახელმწიფოს დაქვემდებარებაში მყოფმა გამალეიას ინსტიტუტმა შეიმუშავა. პრეპარატზე კლინიკურ კვლევებს თავად ინსტიტუტი აწარმოებს. საზღვარგარეთ მის გაყიდვას რუსეთის პირდაპირი ინვესტიციების ფონდი (RDIF) უზრუნველყოფს.