თურნავა: „ნამახვანჰესის" პროექტი გაუმჯობესებული და უსაფრთხო სახით განხორციელდება

09 ივნ 202116:40
3 წუთის საკითხავი
clock clock 195
თურნავა: „ნამახვანჰესის" პროექტი გაუმჯობესებული და უსაფრთხო სახით განხორციელდება

ეკონომიკის მინისტრი ნათია თურნავა აცხადებს, რომ „ნამახვანჰესის“ პროექტი მხოლოდ გაუმჯობესებული და უსაფრთხო სახით განხორციელდება,- ამის შესახებ ეკონომიკის მინისტრმა ნათია თურნავამ ქუთაისის საერთაშორისო აეროპორტის განახლებული ტერმინალის გახნის შემდეგ მედიასთან საუბრისას „ნამახვანჰესთან“ დაკავშირებული კითხვის საპასუხოდ განაცხადა.

მისი თქმით, კაშხლის მშენებლობაზე გამოცხადებული 12-თვიანი მორატორიუმის განმავლობაში ყველაფერი უნდა გაკეთდეს პროექტის გაუმჯობესებისთვის.

„ექსპერტები უკვე მუშაობენ - 15-მდე სხვადასხვა ექსპერტულმა ორგანიზაციამ გაიწვია ის კვლევები, რაც გვქონდა ერთი თვის წინ გამოქვეყნებული. ველოდებით მათ უკუკავშირს, თუ რა აღმოაჩინეს კვლევებში, რაც დამატებით სამუშაოებს საჭიროებს. ყოველ შემთხვევაში, კაშხლის მშენებლობა არ დაიწყება მანამ, ვიდრე ყველა არ დარწმუნდება, რომ ეს ნაგებობა არის განსაკუთრებით უსაფრთხო“,- აღნიშნა ნათია თურნავამ.

მისივე თქმით, ასევე მიდის მუშაობა ინვესტორთან, რათა მოხდეს პირობების გაუმჯობესება და პირველ რიგში, ეს უკავშირდება ხელშეკრულების იმ ნაწილს, რომელიც მიწის იჯარის ვადას - 99 წლით გადაცემას ეხება.

„მართალია, 99 წლით იჯარით გადაცემა შეესაბამება კანონმდებლობას, მაგრამ დავინახეთ, რომ ამასთან დაკავშირებით არის აზრთა სხვადასხვაობა საზოგადოებაში და ვფიქრობთ, რომ ამ ნაწილშიც უნდა მივაღწიოთ პროგრესს. როცა გვექნება საბოლოო გადაწყვეტილება, გავახმოვანებთ. რასაკვირველია, ეს პროექტი მნიშვნელოვანია, ის ენერგეტიკულად აძლიერებს სახელმწიფოს, მაგრამ გაუმჯობესებული და უსაფრთხო სახით განხორციელდება“,- აღნიშნა ნათია თურნავამ.