LIVE

WHO: დაავადებებმა ღაზაში შესაძლოა უფრო მეტი ადამიანი შეიწიროს, ვიდრე დაბომბვამ

29 ნოე 202315:00
3 წუთის საკითხავი
clock clock 162
WHO: დაავადებებმა ღაზაში შესაძლოა უფრო მეტი ადამიანი შეიწიროს, ვიდრე დაბომბვამ

ჯანდაცვის მსოფლიო ორგანიზაციის (WHO) განცხადებით, თუ ჯანდაცვის სისტემა არ აღდგება, დაავადებებმა ღაზაში შესაძლოა, უფრო მეტი ადამიანი შეიწიროს, ვიდრე დაბომბვამ.  

გაეროს შეფასებით, გასული 7 კვირის განმავლობაში, ღაზაში სახლი 1,8 მილიონზე მეტმა ადამიანმა დატოვა. მათი დაახლოებით 60% - 1,2 მილიონი თავს აფარებს 156 დაწესებულებას, რომელიც გაეროს პალესტინელ ლტოლვილთა სააგენტოს, Unrwa-ს ეკუთვნის. დაწესებულებებში ბავშვებში ფართოდაა გავრცელებული დიარეა და რესპირატორული ინფექციები.  

ჯანდაცვის მსოფლიო ორგანიზაციის პრესსპიკერის, მარგარეტ ჰარისის განცხადებით, 5 წლის და უფროსი ასაკის ბავშვებში დიარეის შემთხვევებმა ნოემბრის დასაწყისში ნორმალურ დონეს 100-ჯერ გადააჭარბა. მისივე თქმით, მკურნალობის გარეშე დარჩენის შემთხვევაში, განსაკუთრებული საფრთხე ემუქრებათ ჩვილებს, რომელთა მდგომარეობა შეიძლება გაურესდეს და ფატალურად დასრულდეს.

მკურნალობას ასევე ვერ იღებენ ქრონიკული დაავადებების მქონე პაციენტები.

"საბოლოოდ, თუ ჩვენ [ერთად] ვერ შევძლებთ ჯანდაცვის სისტემის აღდგენას, აღმოჩნდება, რომ უფრო მეტი ადამიანი დაიღუპება დაავადებისგან, დაბომბვასთან შედარებით",- ამბობს ჰარისი.  

გაეროს მონაცემებით, ღაზას ჩრდილოეთით მხოლოდ ხუთი საავადმყოფო ფუნქციონირებს ნაწილობრივ. სამხრეთით კი 11-დან 8 საავადმყოფო მუშაობს. აქედან მხოლოდ ერთს აქვს კრიტიკული ტრავმული მდგომარეობის მქონე პაციენტების მიღების ან რთული ქირურგიული ჩარევის შესაძლებლობა. 

7 ოქტომბერს ღაზის სექტორიდან ისრაელის მიმართულებით ათობით რაკეტა გაუშვეს. თავდასხმაზე პასუხისმგებლობა პალესტინურმა დაჯგუფება ჰამასმა აიღო და თქვა, რომ 20 წუთში 5 000 რაკეტა გამოიყენეს. 

ისრაელის შეიარაღებულმა ძალებმა ჰამასის წინააღმდეგ საპასუხო დარტყმები განახორციელეს - მათ სამხედროების მობილიზება დაიწყეს და "საომარი მდგომარეობის" შესახებ გაფრთხილება გამოაცხადეს.

ჰამასის თავდასხმას სულ მცირე 1200 ადამიანი ემსხვერპლა, დაახლოებით 240 კი მძევლად აიყვანეს. ჰამასის განცხადებით, ღაზას ტერიტორიაზე მსხვერპლის რიცხვმა 14 800-ს გადააჭარბა. 

გასულ კვირას ისრაელსა და ჰამასს შორის, მძევლების და პატიმრების გაცვლის შეთანხმება შედგა და 24 ნოემბრიდან ღაზაში ცეცხლის შეწყვეტის რეჟიმი მოქმედებს.