LIVE

TI-მ სახელმწიფო ელექტროსისტემაში სავარაუდო ნეპოტიზმის ფაქტები გამოააშკარავა

19 ივნ 202314:40
3 წუთის საკითხავი
clock clock 416
TI-მ სახელმწიფო ელექტროსისტემაში სავარაუდო ნეპოტიზმის ფაქტები გამოააშკარავა

„საერთაშორისო გამჭვირვალობა-საქართველოს“ (TI) განცხადებით, გამოააშკარავეს სავარაუდო ნეპოტიზმისა და ფავორიტიზმის შემთხვევები „საქართველოს სახელმწიფო ელექტროსისტემაში“, სადაც ერთ-ერთი დირექტორის თანამდებობას „ქართული ოცნების“ ყოფილი დეპუტატი ვანო ზარდიაშვილი იკავებს.

TI-ს თანახმად, სახელმწიფო ელექტროსისტემაში, ხელისუფლებასთან და სასამართლოს კლანის წარმომადგენლებთან დაკავშირებული 6 ადამიანია დასაქმებული.

„ნეპოტიზმისა და ფავორიტიზმის შემთხვევების გაანალიზებით ნათელია, რომ ზარდიაშვილი დღემდე ინარჩუნებს მჭიდრო კავშირებს სასამართლოს გავლენიან მოსამართლეებთან და ხელისუფლებასთან. სამწუხაროდ, ნეპოტიზმი რჩება შემაშფოთებელ პრაქტიკად, რომელიც ძირს უთხრის მერიტოკრატიას, სამართლიანობასა და საზოგადოების ნდობას საჯარო უწყებების მიმართ.

„ქართული ოცნების“ ხელისუფლებაში მოსვლის შემდგომ, ვანო ზარდიაშვილი 2013-2016 წლებში გენერალური აუდიტორის მოადგილე, ხოლო 2016-2019 წლებში, საქართველოს პარლამენტის წევრი იყო „ქართული ოცნების“ პარტიული სიით. უნდა აღინიშნოს, რომ 2013-2019 წლებში ზარდიაშვილის ქონება მნიშვნელოვნად გაიზარდა. ამ პერიოდში მან დაახლოებით 1 000 000 ლარის ღირებულების ქონება შეიძინა მაშინ, როდესაც მისი და მისი მეუღლის წლიური შემოსავალი ჯამში დაახლოებით 100 000 ლარს შეადგენდა“, - აცხადებენ „საერთაშორისო გამჭვირვალობა-საქართველოში“.

TI-ს თანახმად, ვანო ზარდიაშვილი „საქართველოს სახელმწიფო ელექტროსისტემის“ დირექტორთა საბჭოს წევრი და დირექტორია იურიდიულ, გარემოს დაცვის, სოციალურ და ნებართვების საკითხებში. როგორც ელექტროსისტემების ოფიციალურ ვებგვერდზე განთავსებული ინფორმაციიდან ჩანს, მის დაქვემდებარებაში ორი დეპარტამენტია. კერძოდ, იურიდიულ საკითხთა და სემეკ-თან ურთიერთობისა და გარემოს დაცვის, სოციალური საკითხებისა და ნებართვების დეპარტამენტი. სწორედ ამ ორ დეპარტამენტშია დასაქმებული ზარდიაშვილთან, ხელისუფლებასთან და სასამართლოს კლანის წარმომადგენლებთან დაკავშირებული 6 ადამიანი. ესენი არიან:

1. თამთა თაბუკაშვილი (ვანო ზარდიაშვილის რძალი) - თაბუკაშვილი სახელმწიფო ელექტროსისტემაში გარემოს დაცვის, სოციალური საკითხებისა და ნებართვების დეპარტამენტშია დასაქმებული. იგი ვანო ზარდიაშვილის ცოლის, თინათინ აბრალავას ძმის, გრიგოლ აბრალავას, ცოლია;

2. გიორგი კიკნაძე (ვანო ზარდიაშვილის ოჯახის ახლობელი და ნათესავი) - კიკნაძე სახელმწიფო ელექტროსისტემაში დირექტორის, ვანო ზარდიაშვილის მოადგილეა. როგორც ცნობილია, ვანო ზარდიაშვილი  გიორგი კიკნაძის შვილის ნათლიაა;

3. გიორგი კვარაია (ვანო ზარდიაშვილის ოჯახის ახლობელი და ნათესავი) - კვარაია სახელმწიფო ელექტროსისტემაში გარემოს დაცვის, სოციალური საკითხებისა და ნებართვების დეპარტამენტშია დასაქმებული;

4. სალომე დათუაშვილი-გვრიტიშვილი (გავლენიანი მოსამართლის, თბილისის სააპელაციო სასამართლოს მოსამართლისა და ადმინისტრაციულ საქმეთა პალატის თავმჯდომარის დიმიტრი გვრიტიშვილის ცოლი) - დათუაშვილი გარემოს დაცვის, სოციალური საკითხებისა და ნებართვების დეპარტამენტშია დასაქმებული. იგი საერთაშორისო პროექტების კოორდინატორია;

5. ნიკა მიქაუტაძე (გავლენიანი მოსამართლის, უზენაესი სასამართლოს მოსამართლისა და საქართველოს უზენაესი სასამართლოს თავმჯდომარის მოადგილის გიორგი მიქაუტაძის ბიძაშვილი) - გიორგი მიქაუტაძე და ვანო ზარდიაშვილი კურსელები და ახლო მეგობრები არიან. გიორგი მიქაუტაძე ერთ-ერთი იყო იმ გავლენიან მოსამართლეთა შორის, რომლებიც ზარდიაშვილს პარლამენტის ეზოს სკვერში ხვდებოდა. როგორც „საერთაშორისო გამჭვირვალობა-საქართველოსთვის“ გახდა ცნობილი, ნიკა მიქაუტაძე, გარემოს დაცვის, სოციალური საკითხებისა და ნებართვების დეპარტამენტშია დასაქმებული, იგი სოციალური საკითხების მართვის სამსახურის უფროსია;

6. გელა ოხანაშვილი (საქართველოს პარლამენტის წევრის, იურიდიულ საკითხთა კომიტეტის თავმჯდომარის ანრი ოხანაშვილის მამა) - როგორც „საერთაშორისო გამჭვირვალობა-საქართველოსთვის“ გახდა ცნობილი, იგი  გარემოს დაცვის, სოციალური საკითხებისა და ნებართვების დეპარტამენტშია დასაქმებული.