LIVE

საშაურმეში კრიტიკული შეუსაბამობები გამოვლინდა - სურსათის სააგენტო

25 მაი 202314:17
3 წუთის საკითხავი
clock clock 475
საშაურმეში კრიტიკული შეუსაბამობები გამოვლინდა - სურსათის სააგენტო

სურსათის ეროვნულმა სააგენტომ (სეს) საშაურმე „ბალუს“ საწარმოო პროცესი შეუჩერა და 1 000 ლარით დააჯარიმა.

როგორც სააგენტოში აცხადებენ, მიზეზი გამოვლენილი კრიტიკული შეუსაბამობებია. 

ობიექტის შემოწმების წინაპირობა ტრიქინელოზის დადასტურებული შემთხვევა გახდა. ტრიქინელოზი არის დაავადება, რომელიც ადამიანს შესაძლოა დაემართოს მიკროსკოპული პარაზიტით, ტრიქინელათი ინფიცირებული ცხოველების (ღორი, სხვა გარეული ცხოველი და ცხენი) უმი ან არასაკმარისი თერმული დამუშავების ხორცის საკვებად მიღებისას. ხორცის დამარილება, შებოლვა და გაშრობა პარაზიტს არ კლავს.

"დაავადებათა კონტროლისა და საზოგადოებრივი ჯანმრთელობის ეროვნული ცენტრიდან შემოვიდა შეტყობინება ტრიქინელოზის დადასტურებული შემთხვევის შესახებ.
 
სააგენტოს თბილისის საქალაქო სამსახურის უფლებამოსილმა პირებმა სახელმწიფო კონტროლი განახორციელეს საშაურმეში „ბალუ“ (შპს „მწვადის შაურმა 2018“, ს/კ438730928, მის: ქ. თბილისი, გლდანის რაიონი „ა“ მ/რ, კორპ.58-ის მიმდებარედ). არაგეგმური ინსპექტირებისას, გამოვლინდა კრიტიკული შეუსაბამობები, სურსათის ეტიკეტირებისა და მიკვლევადობის წესის დარღვევა და სხვა. შპს „მწვადის შაურმა 2018-ს“ შეუჩერდა საწარმოო პროცესი კრიტიკული შეუსაბამობების აღმოფხვრამდე და საქმიანობა - ეკონომიკურ საქმიანობათა რეესტრში რეგისტრაციამდე; ასევე, საშაურმეს მიეცა მითითება, აღკვეთოს არასათანადოდ ეტიკეტირებული სურსათის ბაზარზე განთავსება და რეალიზაცია, სანამ არ მოახდენს სურსათის ეტიკეტირებას კანონმდებლობის შესაბამისად. ბიზნესოპერატორი დაჯარიმდა 1 000 ლარით.
 
სურსათის ეროვნული სააგენტო განაგრძობს საშაურმეში გამოყენებული ნედლეულის - ბასტურმის პარტიისა და გაყინული ღორის ხორცის იდენტიფიცირებას",- ამბობენ სეს-ში.