მსოფლიოს უმდიდრესი ადამიანის, ილონ მასკის ქონება დღეში $15 მილიარდით შემცირდა, რადგან Tesla-ს აქციების ფასი, გასული ოთხი თვის განმავლობაში, ყველაზე დაბალ ნიშნულამდე დაეცა.
Bloomberg Billionaires Index-ის მიხედვით, Tesla-ს აღმასრულებელი დირექტორის, ილონ მასკის ქონება ბოლო 24 საათში 6%-ით შემცირდა და ახლა $223 მილიარდს შეადგენს.
ბოლო სამი თვის განმავლობაში Tesla-მ მომხმარებელს რეკორდული ოდენობის - 343,830 ავტომობილი მიაწოდა, თუმცა ის მაინც ჩამორჩება ანალიტიკოსების პროგნოზს - 358,000 ავტომობილს, რაც ინვესტორებისთვის ნეგატიური სიგნალია.
Tesla-ს აქციების ფასი კი 8.6%-ით დაეცა, რაც 3 ივნისის შემდეგ მისი ყველაზე დიდი ერთდღიანი ვარდნაა. კომპანიას ასევე ყველაზე ცუდი შედეგი ჰქონდა S&P 500 ინდექსშიც.
"ტრადიციულად, ჩვენი მიწოდების მოცულობა ყოველი კვარტლის ბოლოს იკლებს. რამდენადაც ჩვენი წარმოების მოცულობა იზრდება, სულ უფრო რთული ხდება სატრანსპორტო შესაძლებლობების უზრუნველყოფა და გონივრულ ფასად ამ პიკური ლოჯისტიკური პრობლემის გადაჭრა კვირების განმავლობაში", - ნათქვამია Tesla-ს განცხადებაში.
მასკმა Twitter-ზე დაწერა, მისი მიზანია კვარტლებს შორის უზრუნველყოს სტაბილური მიწოდება.
საზოგადოების მხრიდან განსაკუთრებული გამოხმაურება მოჰყვა გუშინ ღამით ილონ მასკის რუსეთ-უკრაინას შორის მშვიდობის მიღწევის საკუთარი გეგმას, რომელიც მან Twitter-ზე გამოაქვეყნა და აუდიტორიას ხმის მიცემის შესაძლებლობა მისცა. ტვიტის მიხედვით, ყირიმი რუსეთს უნდა დარჩეს და უკრაინის ოკუპირებულ ტერიტორიებზე განმეორებითი რეფერენდუმი ჩატარდეს.
მასკის იდეას მწვავე კრიტიკა მოჰყვა როგორც უკრაინელების, ასევე, დასავლელი ლიდერებისა და ანალიტიკოსების მხრიდან.
Ukraine-Russia Peace:
- Redo elections of annexed regions under UN supervision. Russia leaves if that is will of the people.
- Crimea formally part of Russia, as it has been since 1783 (until Khrushchev’s mistake).
- Water supply to Crimea assured.
- Ukraine remains neutral.
მას ასევე გამოკითხვის ფორმით გამოეხმაურა უკრაინის პრეზიდენტი ვოლოდიმირ ზელენსკი.
Which @elonmusk do you like more?
მოგვიანებით მასკმა განმარტა, რომ მისმა SpaceX-მა უკრაინის მხარდასაჭერად $80 მილიონი დახარჯა და ის უკრაინის მხარდამჭერია.