JIP-ი Toshiba-ს $15 მილიარდად ყიდულობს

Japan Industrial Partners-ი (JIP) Toshiba-ს ყიდულობს. Toshiba Corp-ის საბჭო JIP-ის $15 მილიარდიან წინადადებას დღეს დათანხმდა. 

წარმატებული გარიგების შედეგად, ერთ-ერთ ყველაზე ცნობილ იაპონურ კომპანიას JIP და მისი თანამემამულე ინვესტორები, მათ შორის Orix, Rohm და Chubu Electric Power შეიძენენ.

Refinitiv-ის მონაცემებით, ეს გლობალურად მიმდინარე წელს მესამე უმსხვილესი ტრანზაქცია იქნება.

Toshiba ფართო კონგლომერატია, რომლის ბიზნესი მოიცავს ბირთვულ ენერგიას, თავდაცვის ტექნოლოგიას და ფლობს მეხსიერების ჩიპების მწარმოებელი კომპანია Kioxia Holdings-ის 40%-ს.

კომპანიაზე მძიმედ აისახა საბუღალტრო და მენეჯმენტის სკანდალები, რომელიც 2015 წელს დაიწყო, რამაც ინვესტორებთან უთანხმოება და ზარალი მოუტანა.

Toshiba-ს აქციები ბოლო ერთი წლის განმავლობაში 12%-ით დაეცა.