ფინეთის მთავრობა მზარდი საზოგადოებრივი და პოლიტიკური ზეწოლის ქვეშ იმყოფება, რათა დახუროს ევროკავშირის აღმოსავლეთ საზღვარი რუსეთთან.
პირველად პანდემიის შემდეგ, შენგენის ვიზების მქონე რუსებს ლეგალურად შეუძლიათ საზღვრის გადაკვეთა ავტობუსით ან მანქანით, მიუხედავად იმისა, რომ მათ ევროკავშირში თვითმფრინავით და მატარებლებით მოგზაურობა ეკრძალებათ.
“რუსებმა დაიწყეს მოსვლა. შოპინგი ყოველთვის იყო ერთ-ერთი მთავარი მიზეზი, რის გამოც რუსი ტურისტები ჩამოდიან ფინეთში, თუნდაც ეს მხოლოდ ერთი დღით იყოს”, - ამბობს იუჰო პესონენი, ტურიზმის ბიზნესის პროფესორი აღმოსავლეთ ფინეთის უნივერსიტეტში.
აბსოლუტური რიცხვები ახლა მცირეა. ივლისში დაახლოებით 176,000 სასაზღვრო გადაკვეთაა. ეს გაცილებით ნაკლებია პანდემიამდელ მაჩვენებელზე. 2019 წლის ივლისში დაახლოებით 950 000 გადაკვეთა განხორციელდა და ყოველდღიურად ათიათასობით რუსი ჩადიოდა ფინეთში.
ფინეთი ახლა ევროკავშირის ბოლო ქვეყანაა, რომელიც რუსეთს ესაზღვრება და ჯერ კიდევ გასცემს ტურისტულ ვიზას. სხვა ქვეყნებმა, როგორიცაა პოლონეთი და ბალტიისპირეთის ქვეყნები, შეწყვიტეს პროცედურები.
კრემლის წარმომადგენელი აცხადებს, რომ მოსკოვი “ძალიან უარყოფითად ირეაგირებს”, თუ ჰელსინკიც შეაჩერებს ვიზების გაცემას რუსებისთვის.
მიუხედავად ამისა, ფინეთის მთავარ პოლიტიკურ პარტიებში ფართო მხარდაჭერაა ვიზების გაცემისა და რუსული ტურიზმის შეჩერების იდეის მიმართ. თუმცა, იდეას გარკვეულწილად ძირს უთხრის ის ფაქტი, რომ დაახლოებით 100 000 რუსს უკვე აქვს ფინეთის თუ სხვა ქვეყნების მიერ გაცემული შენგენის ვიზა.
როგორც ჩანს, ფინეთის მთავრობას ურჩევნია, დაელოდოს ევროკავშირის საერთო პოზიციას ამ საკითხთან დაკავშირებით, ვიდრე ცალმხრივად იმოქმედოს.
ოპოზიციური პარტიის პოლიტიკოსი კაი მიკენენი ამბობს, რომ ჯერ კიდევ მნიშვნელოვანია რუსი ხალხისთვის გზავნილის გაგზავნა სავიზო სანქციებით.
“ეს არ არის შავ-თეთრი საკითხი და ვსაუბრობთ დადებითი და უარყოფითი მხარეების შესახებ. მთავარი გამოწვევა არის ის, რომ შემოსვლის შესაძლებლობის დახურვამ შესაძლოა რუსებში ჩვენს მიმართ აღშფოთება გამოიწვიოს მაშინ, როცა ჩვენი მიზანია აღშფოთება პუტინის რეჟიმისა და მისი ომისკენ იყოს მიმართული. ამ ყველაფრის გათვალისწინებით, სწორია, ვაჩვენოთ რუსებს, რომ მათ, როგორც ერს, აქვთ პასუხისმგებლობა არსებულ რეჟიმსა და პოლიტიკაზე და ჩვენ ვერ გავაგრძელებთ ნორმალურ ურთიერთობებს ორ ქვეყანას შორის”, - თქვა მიკენენმა, მემარჯვენე ცენტრისტული ეროვნული კოალიციის პარტიის საპარლამენტო ჯგუფის თავმჯდომარემ.
ფინეთსა და რუსეთს შორის არის 1340 კმ-იანი დაუცველი საზღვარი და მხოლოდ რამდენიმე ოფიციალური გადასასვლელი.
COVID-მდე, საზღვრის სიახლოვეს მცხოვრები რუსები მიჩვეული იყვნენ ფინეთში სტუმრობას შაბათ-კვირის დასვენებაზე, ან საყიდლებზე ფინურ სუპერმარკეტებსა და უნივერმაღებში.
ზოგიერთ ფინურ ბიზნესს უდავოდ სურდა ესარგებლა რუსების ამ ახალი შემოდინებით.
“ბევრი ადამიანი გაბრაზებულია რუსებზე. მაგრამ, რა თქმა უნდა, ბიზნესი უნდა შეეგუოს ახალ ვითარებას და ბევრისთვის პრობლემა ის არის, რომ არავინ იცის, რა იქნება მომავალ კვირას, შემდეგ თვეში, მომავალ წელს. შეუძლებელია რუსეთის მიმართ პოლიტიკის სტრატეგიის პროგნოზირება. თუ ფინეთში ჩასულ რუსებს გადავხედავთ, ბევრი შოპინგ ტურიზმს ეწევა. გონივრული იქნება, მეწარმემ გაყიდოს ის პროდუქტები, რომლებსაც რუსები ეძებენ, როგორიცაა ყავა ან შაქარი”, - განაცხადა აღმოსავლეთ ფინეთის უნივერსიტეტის პროფესორმა, იუჰო პესონენმა.