გერმანია გეგმავს, შექმნას 30 მილიარდი ევროს ($30,4 მილიარდი) ფონდი ტექნოლოგიებზე ორიენტირებული სტარტაპების მხარდასაჭერად.
მთავრობის მიზანია, ქვეყანა უფრო მიმზიდველ ადგილად აქციოს სტარტაპერებისა და ინოვაციებისთვის.
მთავრობა იმუშავებს კერძო ინვესტორებთან და მიიღებს 10 მილიარდ ევროს სახელმწიფო კრედიტორ KfW-სგან “მომავლის ფონდისთვის”. პრიორიტეტი მიენიჭება კომპანიებს, რომლებიც ინვესტიციებს განახორციელებენ ტექნოლოგიებისა და კლიმატის გადაწყვეტილებებში, მათ შორის ხელოვნური ინტელექტის, წყალბადის ტექნოლოგიების, კვანტური ტექნოლოგიებისა და მდგრადი მობილურობის ჩათვლით.
მიუხედავად იმისა, რომ გერმანიაში სარისკო კაპიტალის ინვესტიციები იზრდება, ევროპის უდიდესი ეკონომიკა კვლავ ჩამორჩება გლობალურ კონკურენტებს. ევროპის უმსხვილესი “მზარდი კომპანიების” უმეტესობა დაფინანსებულია ამერიკელი ინვესტორების მიერ და ქვეყანა ამ გზით მრავალ სტარტაპს იზიდავს. სტრატეგია მიზნად ისახავს წაახალისოს სტარტაპერები, დარჩნენ ევროკავშირში გრძელვადიან პერსპექტივაში.
მთავრობა ასევე ცდილობს, შეამციროს ბარიერები უცხოელებისთვის, რომლებიც ცდილობენ დასაქმებას ქვეყნის ტექნოლოგიურ სექტორში. გაიზრდება დასაქმებულთა აქციების ოფციონებზე გადასახადისგან თავისუფალი თანხა. მთავრობა განიხილავს დისტანციურ მუშაობასთან დაკავშირებულ საკითხებს, მათ შორის საგადასახადო და შრომის კანონმდებლობის ცვლილებას, რათა კომპანიებმა შეძლონ კადრების დაქირავება საზღვარგარეთ.
ანა კრისტმანმა, მთავრობის სპეციალურმა წარმომადგენელმა სტარტაპებში განაცხადა, რომ ახალი სტრატეგია აგზავნის “ნათელ სიგნალს, რომ ვენჩურული კაპიტალი ასევე შეიძლება იყოს საინტერესო ინვესტიცია საჯარო სახსრებისთვის და რომ მცირე წილსაც კი შეიძლება ჰქონდეს დიდი გავლენა სარისკო კაპიტალის ბაზარზე”.
გერმანიის სტარტაპების ასოციაციამ მოიწონა სტრატეგია. მათი თქმით, გეგმა ხაზს უსვამს სტარტაპების მნიშვნელობას გერმანიის გრძელვადიანი კონკურენტუნარიანობისთვის, თუმცა აკრიტიკებენ დაბეგვრის საკითხების გამო.
"გერმანიის მთავრობა არ უნდა დაკმაყოფილდეს სიტუაციის გადახედვის ვალდებულებებით. ჩვენ გვჭირდება მეტი გამბედაობა და მონდომება, რომ გერმანია გავხადოთ გლობალური სტარტაპ ბაზრის ლიდერი",- განაცხადა ასოციაციის თავმჯდომარე კრისტიან მიელმა.
Bloomberg-ის ორიგინალური სტატიის ავტორი: აგი კანტრილი