LIVE

უკრაინაში ინფლაცია ივნისში 21.5%-მდე დაჩქარდა

09 ივლ 202212:39
3 წუთის საკითხავი
clock clock 308
უკრაინაში ინფლაცია ივნისში 21.5%-მდე დაჩქარდა
სამომხმარებლო ფასების ზრდა დაჩქარდა, რაც ომის შედეგად განადგურებულ ქვეყანაზე ზეწოლას კიდევ უფრო ზრდის. ცენტრალურმა ბანკმა ინფლაციური სპირალის წინააღმდეგ საბრძოლველად საპროცენტო განაკვეთები უკვე 25%-მდე გაზარდა.
 
უკრაინაში წლიური ინფლაცია ივნისში 21.5%-მდე გაიზარდა, რაც ყველაზე მაღალი მაჩვენებელია ექვს წელზე მეტი ხნის განმავლობაში. ფასების ზრდა ძირითადად გამოწვეულია საწვავის და სურსათის მიწოდების ხარჯების ზრდით, რაც რუსეთის შეჭრის გამო შეფერხებებს უკავშირდება.
 
უკრაინაში ინფლაციის მაჩვენებელი თებერვლის შემდეგ სწრაფად იზრდება. ქვეყანაზე რუსეთის თავდასხმამ შეაფერხა მიწოდების ჯაჭვები, აიძულა ცენტრალური ბანკი სწრაფად გაეზარდა სესხის აღების ხარჯები და შეუტია ბიუჯეტს, რომელიც სამხედრო ხარჯების გაზრდით და დაკარგული შემოსავლებით უკვე დაზარალებულია.
 
ეკონომიკის დასახმარებლად ცენტრალურმა ბანკმა $7.6 მილიარდის ინტერვენციები განახორციელა. ბანკი ასევე შთანთქავს გრივნას ჭარბ ლიკვიდურობას უცხოური ვალუტის რეზერვებიდან დოლარისა და ევროს გაყიდვით.
 
ცენტრალური ბანკის ხელმძღვანელმა კირილო შევჩენკომ "ჰიპერინფლაციის" რისკების შესახებ საზოგადოება გააფრთხილა. მან ასევე მოუწოდა მთავრობას შეამსუბუქოს ზეწოლა ცენტრალურ ბანკზე და მეტი თანხები ისესხოს ბაზარზე.
 
მიუხედავად იმისა, რომ დასავლელი დონორები უკრაინას რეკონსტრუქციისა და აღდგენის ხარჯებში დახმარებას დაჰპირდნენ, დაპირებული ფინანსები ქვეყნისკენ ისე სწრაფად არ მიდის, როგორც ეს კიევს სურს, რაც მისი საერთაშორისო რეზერვების ვარდნას იწვევს.
 
Bloomberg-ის ორიგინალური სტატიის ავტორი: ვოლოდიმირ ველბიანი