ევროპის საინვესტიციო ბანკის (EIB) ხელმძღვანელის, ვერნერ ჰოიერის თქმით, უკრაინას შესაძლოა რუსეთის შეჭრის შედეგად მიყენებული ზიანის აღსადგენად გარე დახმარების სახით $1.1 ტრილიონი დასჭირდეს.
"ტრილიონი დავასახელე, რადგან საჯარო სივრცეში დასახელებული რიცხვები სრულიად არარეალურად მიმაჩნია ნგრევის დონის გათვალისწინებით",- განაცხადა ევროპის საინვესტიციო ბანკის ხელმძღვანელმა.
ჰოიერმა ასევე აღნიშნა, რომ ევროპამ ამ ძალისხმევაში ძირითადი როლი უნდა შეასრულოს.
უკრაინის აღდგენის ფასი მას შემდეგ გახდა ცნობილი, რაც ევროკავშირის ლიდერებმა ხუთშაბათს და პარასკევს ბრიუსელში შეხვედრა ჩანიშნეს, სადაც უკრაინის რეკონსტრუქციის გეგმა და ბლოკში გაწევრიანების წინადადება უნდა განიხილონ. ევროკომისიამ დახმარების უახლესი პაკეტის წინადადება პირველად მაისის შუა რიცხვებში წარადგინა. პაკეტი უკრაინის ფინანსური საჭიროებების ნაწილის დაფარვას ემსახურება, რომელიც თვეში დაახლოებით 5 მილიარდ ევროს აღწევს.
EIB-მ შესაძლოა ცენტრალური როლი ითამაშოს ომით განადგურებული ქვეყნისთვის ევროკავშირიდან ფულის მიწოდების ძალისხმევაში. ბანკი გერმანიის მთავრობის სასურველი არხია იმ მილიარდობით ევროსთვის, რომელიც, სავარაუდოდ, ბლოკიდან გავა.
ჰოიერმა ასევე აღნიშნა, რომ ის ამჟამად ცდილობს EIB-მ ხელახლა აიღოს ვალდებულება უკრაინის აღდგენის ძალისხმევაში, რომელიც 1 მილიარდიდან 1,5 მილიარდ ევრომდე ჯდება. ბანკის ხელმძღვანელმა თანხმობა შესაძლოა მიმდინარე კვირაში მიიღოს.
Bloomberg-ის ორიგინალური სტატიის ავტორი: სტივენ არონსი