ატომური ენერგიის საერთაშორისო სააგენტოს ხელმძღვანელის მიხედვით, რუსულმა ძალებმა უკრაინის სიდიდით მეორე ქალაქში ატომური ფიზიკის ლაბორატორია გაანადგურეს. განვითარება ხაზს უსვამს ქვეყნის ატომური ობიექტების ირგვლივ გაჩენილ უსაფრთხოების რისკებს.
რაფაელ მარიანო გროსიმ, რომელიც ატომური ენერგიის საერთაშორისო სააგენტოს (IAEA) ხელმძღვანელობს, განაცხადა, რომ რუსული თავდასხმის დროს ხარკოვის ფიზიკისა და ტექნოლოგიების ინსტიტუტში ნეიტრონული გენერატორი განადგურდა. თუმცა, მისი თქმით, ადგილზე რადიოაქტიური მასალის ინვენტარი მცირე იყო და მონიტორებმა რადიაციის გამოყოფა არ დააფიქსირეს.
არგენტინელმა დიპლომატმა ასევე განაცხადა, რომ მზადაა უკრაინელ და რუს ოფიციალურ პირებს მათ სასურველ ლოკაციაზე შეხვდეს, რათა უზრუნველყოს ატომური ობიექტების უსაფრთხოება ომის ესკალაციის დროს. გროსიმ ხაზი გაუსვა, რომ ატომური ობიექტების ფიზიკური მთლიანობა, საკომუნიკაციო არხები და მიწოდების ჯაჭვები გარანტირებული უნდა იყოს.
ეს უკვე მეორე უკრაინული ბირთვული ობიექტია, რომელიც ბოლო ერთი კვირის განმავლობაში შეტაკებების შედეგად დაზიანდა.
IAEA-მ პარასკევს დაადასტურა, რომ რუსულმა ბომბებმა ხანძარი გამოიწვია ზაპოროჟიეს ატომური ელექტროსადგურის შენობაში, რის შედეგადაც ობიექტის დაცვის ორი წევრი დაშავდა.
ევროკავშირის ენერგეტიკის ხელმძღვანელმა IAEA-ს მმართველ საბჭოში ასევე გააკრიტიკა აგრესორი სახელმწიფოს პოზიცია.
ცნობისთვის, რუსეთი მსოფლიოში რეაქტორების მთავარი ექსპორტიორია, პროექტები მიმდინარეობს არგენტინაში, ბანგლადეშში, ეგვიპტეში, უნგრეთსა და თურქეთში.
Bloomberg-ის ორიგინალური სტატიის ავტორი: ჯონათან ტირონი