ჯანდაცვის სამინისტროს ინფორმაციით, საქართველოს ბაზარზე მოქმედ ფარმაცევტულ საწარმოებს, ხარისხის ახალ - GMP სტანდარტზე გადასვლა მომდევნო წლის 1 იანვრის ნაცვლად, ეტაპობრივად, 2022 წლის იმ კონკრეტულ თვემდე შეეძლებათ, როდესაც ფარმაცევტული პროდუქტის წარმოების ნებართვა აქვთ მიღებული. თუმცა, ამავე დროს, დამატებითი შეღავათი განესაზღვრათ იმ მწარმოებლებს, რომლებსაც წარმოების ნებართვის ვადა ივნისის თვემდე აქვთ. მათ ხარისხის სერტიფიკატი 30 ივნისამდე უნდა მოიპოვონ.
გარდამავალი პერიოდის დაწესების შესახებ ინფორმაცია, ფარმაცევტული ასოციაციების წარმომადგენლებს ჯანდაცვის მინისტრმა მიაწოდა. მისივე თქმით, იგივე შეღავათებით ისარგებლებენ საბითუმო დისტრიბუტორებიც.
შეხვედრაზე მხარეებმა ფარმაცევტული კუთხით 2022 წლიდან დაგეგმილი ცვლილებები განიხილეს, რაც საქართველოში კარგი საწარმოო (GMP) და სადისტრიბუციო (GDP) პრაქტიკის ამოქმედებას ისახავს მიზნად.
სამედიცინო და ფარმაცევტული საქმიანობის რეგულირების სააგენტოს დირექტორის ზაალ კაპანაძის განცხადებით, დადგენილებაში შედის ცვლილება და იმ მწარმოებლებს, რომლებიც GMP სტანდარტს ვერ დააკმაყოფილებენ, მედიკამენტების ექსპორტის საშუალება მაინც ექნებათ.
„თუ ადგილობრივი მწარმოებლები ვერ ახერხებენ ამ სტანდარტზე გადასვლას, გამომდინარე იქიდან, რომ მათ წლებია გარკვეული ბაზრები მეზობელ ქვეყნებში აქვთ მოძიებული, 2025 წლამდე ექნებათ უფლება, აღნიშნული პროდუქციის ექსპორტი განახორციელონ“,- განაცხადა ზაალ კაპანაძემ.
„ფარმაცევტული კომპანიების წარმომადგენელთა ასოციაციის“ აღმასრულებელმა დირექტორმა ირაკლი მარგველაშვილმა გადაწყვეტილება დადებითად შეაფასა და აღნიშნა, რომ ინიციატივა ხელს შეუწყობს იმ კომპანიებს, ვისაც ახალ, ხარისხის სტანდარტზე გადასვლის სურვილი და რესურსი გააჩნიათ.
შეხვედრაზე ჯანდაცვის მინისტრის მოადგილემ, თამარ გაბუნიამ განაცხადა, რომ შეიქმნება ფარმაციის საბჭო, რომელიც სფეროში დაგეგმილ ცვლილებებს განიხილავს.