უორენ ბაფეტის კონგლომერატის, Berkshire Hathaway-ის ნაღდი ფულის მარაგი მე-3 კვარტალში რეკორდულ $157 მილიარდამდე გაიზარდა. გასულ კვარტალში ეს მაჩვენებელი $147.4 მილიარდს შეადგენდა.
კომპანიის მიერ გამოქვეყნებული ანგარიშის მიხედვით, მე-3 კვარტალში მისი საოპერაციო შემოსავალი, გასულ წელთან შედარებით, 40%-ზე მეტით გაიზარდა და $10,8 მილიარდი შეადგინა.
ამასთან, Berkshire-ის წმინდა დანაკარგმა $12,8 მილიარდი შეადგინა. გასული წლის იმავე პერიოდში, ეს მაჩვენებელი $2,8 მილიარდი იყო.
Berkshire-ის სადაზღვევო ბიზნესმა $2,4 მილიარდის შემოსავალი მიიღო. გასული წლის იმავე კვარტალში მას $1,1-მილიარდიანი დანაკარგი ჰქონდა. სადაზღვევო ინვესტიციების შემოსავალი წინა წლის იმავე პერიოდთან შედარებით, $1,4 მილიარდიდან $2,5 მილიარდამდე გაიზარდა.
უორენ ბაფეტის ქონება ამჟამად $118 მილიარდს შეადგენს და Bloomberg-ის მსოფლიოს უმდიდრესი ადამიანების სიაში მე-7 ადგილს იკავებს.