საავტომობილო ზეთების იმპორტი გაიზარდა, საავიაციო ნავთის კი - შემცირდა

2023 წლის იანვარ-ივლისში საქართველოში საავტომობილო ზეთების იმპორტი გაიზარდა, საავიაციო ნავთის კი - შემცირდა.

ნავთობპროდუქტების იმპორტიორთა კავშირის ინფორმაციით, 7 თვეში საცხებ-საპოხი მასალების იმპორტმა 13.23 ათასი ტონა შეადგინა, რაც 2022 წლის ანალოგიური პერიოდის მონაცემებთან შედარებით 9.7%-იანი ზრდაა.  

იანვარ-ივლისში საცხებ-საპოხი მასალების იმპორტი ყველაზე დიდი მოცულობით შემდეგი ქვეყნებიდან განხორციელდა:

• თურქეთი - 2.79 ათასი ტონა (მთლიანი იმპორტის 21.1%);
• ირანი - 2.74 ათასი ტონა (20.7%);
• გერმანია - 1.50 ათასი ტონა (11.3%);
• აზერბაიჯანი - 0.82 ათასი ტონა (6.2%).

7 თვეში მცირედით, თუმცა იკლო საავიაციო ნავთის იმპორტმა. კერძოდ, იმპორტის მოცულობა 67.1 ათასი ტონა იყო. წლიური კლება 0.7%-ია.

იანვარ-ივლისში საავიაციო ნავთის იმპორტი ყველაზე დიდი მოცულობით შემდეგი ქვეყნებიდან განხორციელდა:

• თურქმენეთი - 29.6 ათასი ტონა (მთლიანი იმპორტის 44.1%);
• აზერბაიჯანი - 17.3 ათასი ტონა (25.8%);
• საბერძნეთი - 10.3 ათასი ტონა (15.3%);  
• თურქეთი - 6.7 ათასი ტონა (10%);
• მალტა - 3.2 ათასი ტონა (4.8%).