LIVE

რომის ტრევის შადრევანში კლიმატის აქტივისტებმა წყალი გააქტიურებული ნახშირით გააშავეს

21 მაი 202319:10
3 წუთის საკითხავი
clock clock 614
რომის ტრევის შადრევანში კლიმატის აქტივისტებმა წყალი გააქტიურებული ნახშირით გააშავეს

შვიდმა ახალგაზრდა აქტივისტმა, რომლებიც კლიმატის ცვლილებას აპროტესტებენ, რომის უდიდეს, ტრევის შადრევანში კვირას გააქტიურებული ნახშირი ჩაყარეს და წყალი გააშავეს.

Ultima Generazione-ს ("უკანასკნელი თაობა") ჯგუფის მომიტინგეებმა შადრევნის წყალში აღმართეს ბანერები წარწერებით: "ჩვენ არ გადავიხდით საწვავის ფულს" და "ჩვენი ქვეყანა იღუპება."

რობერტო გუალტიერიმ, რომის მერმა, საპროტესტო დემონსტრაცია დაგმო: "საკმარისია აბსურდული თავდასხმები ჩვენს მხატვრულ მემკვიდრეობაზე", - წერს გუალტიერი Twitter-ზე. 

განცხადებას აქვეყნებს აქტივისტების წარმომადგენელი ჯგუფი Ultima Generazione-ც, რომელიც მოითხოვს, სახელმწიფომ შეწყვიტოს წიაღისეული საწვავის სფეროს სუბსიდირება. რაც შეეხება აღნიშნულ დემონსტრაციას, ჯგუფის თქმით, იგი წარმოადგენს იტალიაში, ემილია-რომანიას რეგიონში წყალდიდობებზე პასუხს.

აღსანიშნავია, რომ იტალიის აღნიშნულ რეგიონში გამანადგურებელმა წყალდიდობებმა 14 ადამიანის სიცოცხლე იმსხვერპლა, დაახლოებით 36 000 ადამიანი კი იძულებული გახდა, საკუთარი საცხოვრებელი სახლი დაეტოვებინა; ბევრიც ელექტროენერგიის გარეშე დარჩა. რეგიონს უკვე ესტუმრა პრემიერმინისტრი ჯორჯია მელონი, რომელმაც სწორედ ამ მიზეზით დატოვა ნაადრევად G7-ის სამიტი იაპონიაში.

წინასწარი დათვლებით, წყალდიდობებისგან გამოწვეული ზარალი იტალიისთვის მილიარდობით ევროს აღწევს. სამშაბათს იტალიის მთავრობა შეიკრიბება და დაზარალებული მოსახლეობის დასახმარებლად იმსჯელებს.