LIVE

აშშ-ში Covid ვაქცინაცია შესაძლოა ფასიანი გახდეს

31 აგვ 202213:20
3 წუთის საკითხავი
clock clock 183
აშშ-ში Covid ვაქცინაცია შესაძლოა ფასიანი გახდეს
David Paul Morris/Bloomberg

შეერთებული შტატების მთავრობამ შესაძლოა სახელმწიფოს ფინანსებით Covid-19-ის ვაქცინების შეძენა და მიწოდება 2023 წლიდან შეაჩეროს. ასეთ შემთხვევაში, მოქალაქეები ვაქცინაციას საკუთარი სახსრებით ან დაზღვევის საშუალებით შეძლებენ. 

აშშ-ის ჯანდაცვის ოფიციალურმა წარმომადგენლებმა მოიწვიეს შეხვედრა წამლების მწარმოებლების, სახელმწიფო და ადგილობრივი ჯანდაცვის დეპარტამენტების, ჯანდაცვის პროვაიდერებისა და სადაზღვევო კომპანიების 100-ზე მეტი წარმომადგენლის მონაწილეობით, რათა განეხილათ მთავრობის გეგმები, გადაიტანონ Covid-ის ვაქცინების და თერაპიული საშუალებების გაყიდვები კომერციულ ბაზარზე.

პანდემიის დაწყებიდან აშშ-ის მთავრობა და ფარმაცევტული კომპანიები განიხილავენ Covid-ის ვაქცინების და მედიკამენტების ფედერალური შესყიდვიდან კომერციულ გაყიდვებზე გადასვლას, როგორც ეს სეზონური გრიპის ვაქცინების შემთხვევაში ხდება.

“ყოველთვის გვქონდა განზრახული კომერციულ ბაზარზე გამოტანა და გარკვეული პერიოდის განმავლობაში ვგეგმავდით გადასვლას. სამწუხაროდ, გარდამავალი ვადები დაჩქარდა ბოლო ექვსი თვის განმავლობაში კონგრესის დამატებითი სახსრების გარეშე ამ სამუშაოს მხარდასაჭერად”, - წერს ჯანდაცვისა და ადამიანური მომსახურების დეპარტამენტის სტრატეგიული მზადყოფნისა და რეაგირების ოფისის ხელმძღვანელი, დონ ო'კონელი.

ო’კონელის თქმით, 530 დღე გავიდა მას შემდეგ, რაც აშშ-ის მთავრობამ მიიღო ახალი დაფინანსება კოვიდზე რეაგირებისთვის. აშშ ასევე მოელის, რომ შეაჩერებს კოვიდ მედიკამენტების საფასურის გადახდას, როგორიცაა Pfizer's Paxlovid, 2023 წლის შუა რიცხვებში, როდესაც მარაგი ამოიწურება.

ორმხრივი მოლაპარაკებები Covid-ის ახალ ფონდებთან დაკავშირებით თვეების განმავლობაში შეჩერებული იყო. დემოკრატებმა დაბლოკეს $15 მილიარდის ფონდები, ხოლო სენატის რესპუბლიკელებმა უარი თქვეს $10 მილიარდის პაკეტის მხარდაჭერაზე ჯო ბაიდენის ადმინისტრაციის საიმიგრაციო პოლიტიკის წინააღმდეგობის მოტივით.

დაფინანსება საჭიროა შემდეგი თაობის ვაქცინების, თერაპიებისა და Covid-ის ტესტებისთვის. შეერთებულმა შტატებმა შეიძინა 171 მილიონი დოზა მოდიფიცირებული Covid ვაქცინები, რომლებიც შექმნილია ომიკრონისა და მისი ქვევარიანტებისგან უკეთ დასაცავად. მოსალოდნელია, რომ გამაძლიერებელი დოზები გამოსაყენებლად დამტკიცდება მიმდინარე კვირის ბოლოს და შესთავაზებენ ადამიანებს უფასოდ, როგორც ეს იყო მთელი პანდემიის დროს. მიუხედავად იმისა, რომ მიწოდება არ იქნება საკმარისი ყოველი ზრდასრული ადამიანის ვაქცინაციისთვის, მას შეუძლია დააკმაყოფილოს ადრეული მოთხოვნა.

შეერთებულმა შტატებმა უკვე დაიწყო Covid-ის გარკვეული პროდუქტების კომერციულ ბაზარზე გადატანა სახსრების ნაკლებობის გამო. აგვისტოს დასაწყისში, Eli Lilly & Co-მ გამოაცხადა, რომ მიჰყიდის Covid ანტისხეულების მკურნალობას უშუალოდ ჯანდაცვის პროვაიდერებს, შტატებსა და ტერიტორიებს, რათა წამალი ხელმისაწვდომი იყოს.

Covid-ის სხვა სამკურნალო საშუალებები მალე კომერციულად გაიყიდება. აშშ მოელის AstraZeneca-ი Evusheld-ის ამოწურვას 2023 წლის დასაწყისში, რასაც მოჰყვება Merck & Co-ის Lagevrio მომავალი წლის პირველ ან მეორე კვარტალში.

Bloomberg-ის ორიგინალური სტატიის ავტორები: რაილი გრიფინი და ალექსანდრ რუფი