მიმდინარე წელს საქართველომ რეკორდულად მაღალი რაოდენობის ფულადი გზავნილები მიიღო. 9 თვეში ქვეყანაში $1.7 მილიარდზე მეტი გადმოირიცხა, რაც გასული წლის ანალოგიური პერიოდის მაჩვენებელს 28%-ით აღემატება. 36%-იანი ზრდა ფიქსირდება პანდემიამდელ 2019 წელთან შედარებითაც.
სექტემბერში საქართველოში გადმორიცხული ფულადი გზავნილების მოცულობამ 209.7 მლნ აშშ დოლარი (653.5 მლნ ლარი) შეადგინა, რაც 9%-ით (17 მლნ აშშ დოლარით) მეტია 2020 წლის სექტემბრის მაჩვენებელზე.
ეროვნული ბანკის მონაცემებით, სექტემბერში შემოსული ფულადი გზავნილები თითქმის 5 მლნ აშშ დოლარით აღემატება მიმდინარე წლის აგვისტოს მონაცემებს. სექტემბერში ევროკავშირის ქვეყნებიდან 84.19 მლნ აშშ დოლარი გადმოირიცხა, რაც მთლიანი გზავნილების 40%-ია.
ევროკავშირის ქვეყნებიდან ფულადი გზავნილებით კვლავ იტალია ლიდერობს 34.07 მლნ აშშ დოლარით (წლიური ზრდა თითქმის 17%). შემდეგ მოდის საბერძნეთი 19.99 აშშ დოლარით. აღსანიშნავია, რომ საბერძნეთიდან სექტემბერში გზავნილებით თითქმის 7%-ით შემცირდა.
ყველაზე მეტი თანხა 38.57 მლნ აშშ დოლარი რუსეთიდან გადმოირიცხა (წლიური ზრდა თითქმის 10%).
2021 წლის სექტემბერში საქართველოდან საზღვარგარეთ 29.2 მლნ აშშ დოლარი გადაიგზავნა, რაც 2020 წლის სექტემბრის ანალოგიურ მაჩვენებელთან შედარებით 16.6%-ით მეტია.