საქსტატის წინასწარი მონაცემებით, 2023 წლის III კვარტალში საქართველოში 316 მლნ აშშ დოლარის პირდაპირი უცხოური ინვესტიცია განხორციელდა. 2022 წლის შესაბამის პერიოდთან შედარებით, ინვესტიციების მოცულობა 504.3 მლნ აშშ დოლარით (61.5%) შემცირდა. 

საქსტატის თანახმად, უცხოური ინვესტიციების კლების უმთავრესი მიზეზი სავალო ვალდებულებებისა და რეინვესტირების მოცულობის შემცირება იყო. 

III კვარტალში, გასული წლის შესაბამის პერიოდთან შედარებით, სააქციო კაპიტალი 2.5-ჯერ, 590.3 მლნ აშშ დოლარამდე გაიზარდა, ხოლო რეინვესტირების მოცულობა 30%-ით შემცირდა და 329.2 მლნ აშშ დოლარს გაუტოლდა. 

ივლისი-სექტემბრის პერიოდში ყველაზე მეტი პირდაპირი უცხოური ინვესტიცია საფინანსო და სადაზღვევო საქმიანობების სექტორში განხორციელდა და 80.2 მლნ აშშ დოლარი შეადგინა, რაც მთლიანი პირდაპირი უცხოური ინვესტიციების 25.4%-ია. შემდეგ იყო ტრანსპორტის სექტორი - 61.9 მლნ აშშ დოლარით (19.6%) და ინფორმაციისა და კომუნიკაციის სექტორი - 41 მლნ აშშ დოლარით (13%).

III კვარტალში საქართველოში განხორციელებული პირდაპირი უცხოური ინვესტიციების მიხედვით, უმსხვილესი ინვესტორი ქვეყნების სამეული შემდეგნაირად გადანაწილდა: პირველ ადგილზე იყო აშშ - 51.8 მლნ აშშ დოლარით, რაც მთლიანი პირდაპირი უცხოური ინვესტიციების 16.4%-ს შეადგენდა, მეორეზე - გაერთიანებული სამეფო 45.8 მლნ აშშ დოლარით (14.5%), ხოლო მესამეზე - ნიდერლანდები 45.3 მლნ აშშ დოლარით (14.3%).