2020 წლის მარტიდან 2022 წლის მარტამდე პერიოდში კოვიდ-სასტუმროებზე საქართველოს ბიუჯეტიდან 109 276 896 ლარი დაიხარჯა.
რა დაუჯდა ბიუჯეტს კოვიდ-სასტუმროების შენახვა და რა თანხა იხარჯებოდა ერთ ინფიცირებულზე, შესაბამისი ინფორმაცია „ბიზნეს ფორმულამ“ ტურიზმის ეროვნული ადმინისტრაციიდან გამოითხოვა.
უწყების ცნობით, ყველაზე მეტი, 73 057 762 ლარი, 2020 წელს დაიხარჯა. 2021 წელს გაწეულმა ხარჯმა შეადგინა 29 651 370 ლარი, ხოლო 2022 წლის პირველი კვარტლის ხარჯმა 6 567 764 ლარი.
2020 წლის მარტიდან დეკემბრის მდგომარეობით საკარანტინო/კოვიდ სივრცედ მიახლოებით გამოყენებული იყო 219 სასტუმრო. 2020 წლის მარტიდან 2022 წლის თებერვლამდე კი 258. სასტუმროს მომსახურებაში შედიოდა: განთავსება, კვება, დეზინფექცია, დაცვა და სამედიცინო მომსახურება.
რაც შეეხება კოვიდ-სასტუმროში ერთ ინფიცირებულზე გაწეულ ხარჯს, როგორც „ბიზნეს ფორმულას“ ტურიზმის ადმინისტრაციიდან აცნობეს, მას შემდეგ, რაც 2020 წლის 21 მარტიდან გამოცხადდა საგანგებო მდგომარეობა, პროექტში ჩართული ყველა სასტუმროსთვის, ამოქმედდა ერთიანი ტარიფი, 59 ლარი, საიდანაც სამჯერად კვებით მომსახურებაზე ფიქსირებული ტარიფი ყოველი სასტუმროსთვის იყო 25 ლარი.
შემდეგ, ტარიფი საშუალოდ 80, 100 და 120 ლარამდე გაიზარდა. ტარიფის გადახედვის მიზეზად ტურიზმის ადმინისტრაციაში კერძო სექტორის წინაშე არსებულ პრობლემებს ასახელებს, როგორებიცაა: კომუნალური გადასახადების გაზრდა, ქვეყანაში ტურისტული ნაკადის შემოსვლა და ტურიზმის ინდუსტრიის აქტიურად ამოქმედება.
ამასთან, უწყების განცხადებით, როდესაც სასტუმროების საკარანტინო სივრცეებად დაჯავშნა დაიწყო (2020 წლის 10 მარტიდან) სასტუმროების ნაწილი სხვადასხვა მიზეზით, მათ შორის მაღალი რეპუტაციული რისკის გამო, უარს აცხადებდა პროექტში მონაწილეობაზე. ასევე, სასტუმროების ნაწილი ვერ ახერხებდა პროექტში ჩართვას საჭირო უსაფრთხოებისა და სანიტარიული სტანდარტების არქონის გამო.
აღსანიშნავია, რომ კოვიდ-სასტუმროებთან დაკავშირებულ შესყიდვებში არაერთ დარღვევაზე მიუთითებენ არასამთავრობო ორგანიზაციები. კერძოდ, „საერთაშორისო გამჭვირვალობა - საქართველოს“ (TI) თანახმად, მსხვილი კონტრაქტების „ქართული ოცნების“ შემომწირველ სასტუმროებთან გაფორმების ტენდენცია გამოიკვეთა.
ინფორმაციის თავისუფლების განვითარების ინსტიტუტის (IDFI) კვლევის თანახმად, ყველაზე პრობლემური საკითხია ფასების ლიმიტების დადგენის დაგვიანება. გამოიკვეთა, რომ ლიმიტების ამოქმედების შემდეგ, მხოლოდ ერთ სასტუმროში 120 ოთახის დაქირავება ერთი თვით ტურიზმის ადმინისტრაციას 1.1 მილიონი ლარით იაფი დაუჯდა, ვიდრე დადგენილების ამოქმედებამდე იმავე სასტუმროს იდენტური მომსახურება.
აღსანიშნავია, რომ კოვიდ-სასტუმროებში პერსონალის ანაზღაურებასთან დაკავშირებით დარღვევები აღმოაჩინა შრომის ინსპექციამ. შრომის ინსპექციის ხელმძღვანელის, ბექა ფერაძის ინფორმაციით, 2021 წელს შემოწმებული 110 კოვიდ-კლინიკიდან 86-ში დარღვევები გამოვლინდა, რომლებიც ამ დრომდე არ აღმოფხვრილა.
შეგახსენებთ, უწყებათაშორისი საკოორდინაციო საბჭოს გადაწყვეტილებით, საკარანტინე სივრცეები, ე.წ კოვიდ-სასტუმროები 1-ლი მარტიდან გაუქმდა.