Galt & Taggart-ის კვირის მიმოხილვის თანახმად, 2023 წლის იანვარ-თებერვალში საქართველომ ტურიზმიდან 607 მლნ დოლარის შემოსავალი მიიღო. წლიური ზრდა 176.9%-ია.
მხოლოდ თებერვალში ტურიზმიდან შემოსავლები წლიურად 191.8%-ით, 307 მლნ დოლარამდე გაიზარდა. იანვრის შემოსავალმა კი 300 მლნ დოლარი შეადგინა.
Galt & Taggart-ის ეკონომისტმა ლაშა ქავთარაძემ იანვრის ბოლოს „ბიზნეს ფორმულასთან“ განაცხადა, რომ 2023 წელს ტურიზმის შემოსავლების ზრდა დაახლოებით 15%-ის ფარგლებში გაგრძელდება.
შეგახსენებთ, PMC კვლევითი ცენტრის ინფორმაციით, 2022 წელს საქართველოში საერთაშორისო ვიზიტორების რაოდენობამ 3.9 მილიონს მიაღწია, რაც 176%-ით მეტია 2021 წლის მონაცემზე. აღსანიშნავია, რომ 2022 წლის მაჩვენებელი, ვიზიტორთა პანდემიამდელი რაოდენობის 65%-ს შეადგენს. PMC-ის შეფასებით, ზრდის მიზეზი შესაძლოა იყოს როგორც ტურისტული, ისე, არატურისტული ვიზიტების მატება.
ეროვნული ბანკის მონაცემებით, 2022 წელს საქართველომ საერთაშორისო მოგზაურებიდან 3 მლრდ 517 მლნ დოლარის შემოსავალი მიიღო. აღსანიშნავია, რომ ტურიზმიდან შემოსავლებით რუსეთი ლიდერობდა. იანვარი-დეკემბრის სტატისტიკა აჩვენებს, რომ რუსმა მოგზაურებმა ქვეყანაში 891 მლნ დოლარი დახარჯეს.