Apple “იყიდე ახლა, გადაიხადე მოგვიანებით” სერვისს ნერგავს, რომლის ფარგლებშიც კრედიტორი თავად იქნება. ეს ტექნოლოგიური გიგანტის კიდევ ერთი ნაბიჯია ფინანსური მომსახურების ინდუსტრიაში.
Apple-ის საკუთრებაში არსებული შვილობილი კომპანია ზედამხედველობას გაუწევს საკრედიტო შემოწმებას და მიიღებს გადაწყვეტილებებს საკრედიტო სერვისისთვის, სახელწოდებით Apple Pay Later. Apple Financing-ს აქვს საჭირო სამთავრობო დაკრედიტების ლიცენზიები აღნიშნული ფუნქციის შესათავაზებლად, თუმცა ის მუშაობს Apple-ის ძირითადი კორპორაციისგან დამოუკიდებლად.
ეს პირველი შემთხვევაა, როდესაც Apple-მა საკუთარ თავზე აიღო ძირითადი ფინანსური ამოცანები, როგორიცაა სესხების, რისკებისა და საკრედიტო რეიტინგების მართვა.
აქამდე Apple-ის ფინანსურ სერვისებს მხარს უჭერდნენ მესამე მხარის კრედიტორები და ბანკები. Apple Card-ის საკრედიტო ბარათი, მაგალითად, ეყრდნობა Goldman Sachs-ს დაკრედიტებისა და კრედიტუნარიანობის შეფასებისთვის.
Goldman Sach-ი მოკრძალებულ როლს ინარჩუნებს ახალ პროგრამაში. ფინანსური კომპანია არის Mastercard-ის გადახდის ინფორმაციის გამცემი, რომელიც გამოიყენება Apple Pay Later-ით შესყიდვების განსახორციელებლად. Apple Financing-ს არ აქვს საკუთარი საბანკო წესდება.
Apple მუშაობს ფინანსური სერვისების მრავალი ელემენტის კომპანიის შიგნით გადატანაზე ახალი ინიციატივით, სახელწოდებით Breakthrough. დაკრედიტების, შემოწმებისა და გადაწყვეტილების მიღების გარდა, Apple მუშაობს გადახდის დამუშავების საკუთარ სისტემაზე, რომელმაც საბოლოოდ შეიძლება ჩაანაცვლოს CoreCard-ი, იტყობინება Bloomberg-ი.
Apple ასევე მუშაობს მომხმარებელთა მომსახურების ახალ მახასიათებლებზე, თაღლითობის ანალიზზე, საპროცენტო განაკვეთების გამოთვლის ინსტრუმენტებსა და სხვა სერვისების მომსახურების ანაზღაურებაზე.
მხოლოდ რამდენიმე კომპანიას შეუძლია Apple-ის შესაბამისი ფინანსურ რესურსების მობილიზება. მას ჰქონდა თითქმის $200 მილიარდის ნაღდი ფული და გაყიდვადი ფასიანი ქაღალდები გასული კვარტლის ბოლოს, ასევე თითქმის $95 მილიარდის შემოსავალი ბოლო ფისკალური წლისთვის. თუმცა, Apple Pay Later-ის ტრანზაქციები შეიზღუდება მომხმარებლის საკრედიტო ისტორიის საფუძველზე და ეს კომპანიისთვის განსაკუთრებულ პერსპექტივას არ ქმნის.
Apple-ს სურს მეტი კონტროლი ჰქონდეს პროცესზე, რაც საშუალებას მისცემს, უფრო სწრაფად განახორციელოს ახალი იდეები და პოტენციურად მეტი შემოსავალი მიიღოს.
Apple Pay Later, რომელიც 6 ივნისს გამოქვეყნდა კომპანიის დეველოპერთა მსოფლიო კონფერენციაზე, როგორც iOS 16 ოპერაციული სისტემის ნაწილი, საშუალებას მისცემს მომხმარებლებს, გაანაწილონ ნებისმიერი Apple Pay-ის ტრანზაქციის ღირებულება ოთხ გადახდაზე ექვსი კვირის განმავლობაში. პროგრამა პირველად შეერთებულ შტატებში ამოქმედდება, თუმცა Apple გეგმავს საბოლოოდ გააფართოოს ახალი ფინანსური სერვისები სხვა რეგიონებში.
Bloomberg-ის ინფორმაციით, კომპანია ასევე მუშაობს გრძელვადიან პროგრამაზე, სახელწოდებით Apple Pay Monthly. მიუხედავად იმისა, რომ Apple Pay Later-ის მოკლევადიანი შეთავაზება არ იყენებს Goldman Sachs-ს ან სხვა მსხვილ პარტნიორებს, გრძელვადიანი გეგმა სავარაუდოდ დაეყრდნობა სხვა კომპანიებს, მათ შორის Goldman Sachs-ს.
აპრილში Goldman Sachs-ის აღმასრულებელმა დირექტორმა დევიდ სოლომონმა განაცხადა, რომ მისი კომპანია “ძალიან კმაყოფილია” Apple-თან პარტნიორობით.
მიმდინარე წლის დასაწყისში Apple-მა შეიძინა ბრიტანეთში დაფუძნებული სტარტაპი Credit Kudos-ი, რომელიც იყენებს საბანკო მონაცემებს დაკრედიტების გადაწყვეტილების მისაღებად. IPhone-ის მწარმოებლის შიდა რისკის შეფასების მექანიზმი ითვალისწინებს მომხმარებლების ისტორიას, მაგალითად, თუ განახორციელეს რეგულარული შესყიდვები ან თუ მათი საკრედიტო ბარათი ოდესმე იყო დაკავშირებული iTunes-თან ან App Store-თან.
ანაზღაურების სერვისის გარდა, Apple გეგმავს გამოიყენოს საკუთარი დაკრედიტება და ტექნოლოგია მომავალი iPhone აპარატურის გამოწერის პროგრამისთვის. თუმცა, მას არ აქვს უახლოესი გეგმები Goldman Sachs-ის დატოვების, Apple Card-ის ან სხვა საბანკო პარტნიორების სასარგებლოდ Apple Pay-ის რეგულარული ტრანზაქციებისთვის.
Apple-ის “იყიდე ახლა, გადაიხადე მოგვიანებით” განიხილება, როგორც საფრთხე Affirm Holdings-ისა და Klarna Bank-ისთვის, რომლებიც მსგავს მომსახურებას ახორციელებენ. Affirm-ის აღმასრულებელმა დირექტორმა, მაქს ლევჩინმა განაცხადა, რომ არ აწუხებს Apple-ის ინიციატივა.
Bloomberg-ის ორიგინალური სტატიის ავტორი: მარკ გურმანი