2009 წელს სამი უკრაინელის მიერ დაარსებულ Grammarly-ს 600-ზე მეტი თანამშრომელი ჰყავს და ნახევარ მილიონზე მეტ აპლიკაციასთან ერთად მუშაობს. ის წელიწადში 14 ტრილიონ სიტყვას აანალიზებს 30 მილიონი ყოველდღიური აქტიური მომხმარებლისთვის მთელ მსოფლიოში.
Grammarly უკვე არის მსოფლიოში ერთ-ერთი ყველაზე დიდი "უნიკორნი" მას შემდეგ, რაც ნოემბერში $200 მილიონი შეაგროვა ინვესტორებისგან, მათ შორის BlackRock-ისა და Baillie Gifford-ისგან. კომპანია ამჟამად $13 მილიარდად არის შეფასებული.
Grammarly-მ მილიარდერები გახადა მისი სულ მცირე ორი დამფუძნებელი, მაქს ლიტვინი და ალექს შევჩენკო, რომელთა ქონება Bloomberg Billionaires Index-ის მიხედვით, მინიმუმ $2,4 მილიარდს შეადგენს.
შევჩენკო და ლიტვინი 1990-იანი წლების ბოლოს კიევის საერთაშორისო ქრისტიანულ უნივერსიტეტში ბიზნესის ადმინისტრირების სწავლისას დამეგობრდნენ. შემდეგ ისინი აშშ-სა და კანადაში მაგისტრატურის გასაგრძელებლად გადავიდნენ. Grammarly-ის იდეა კი მათი წინა კომპანიისგან წარმოიშვა, რომელიც პლაგიატის თავიდან ასაცილებლად შექმნეს.
Grammarly-ისთვის გარდამტეხი მომენტი 2014 წელს დადგა, როდესაც კომპანიამ მომხმარებელს უფასო გეგმა შესთავაზა ძირითადი მახასიათებლებით. ერთი წლის შემდეგ მან გამოუშვა ბრაუზერის უფასო ვერსია. ეს დაეხმარა კომპანიას მომხმარებელთა ერთგული ბაზის ჩამოყალიბებაში, მათ შორის ისეთ ცნობილ კომპანიებში, როგორიცაა Expedia Group და Cisco Systems.
თუმცა, კომპანია ზრდის მომდევნო ეტაპზე მრავალ ახალ გამოწვევას აწყდება. პირველ რიგში, მკვლევრებმა გამოთქვეს შეშფოთება, რომ პროგრამამ შეიძლება ფუნდამენტურად შეცვალოს ადამიანის გამოხატვის უნარი. ეს ეხმიანება ტექნოლოგიური ინდუსტრიის უფრო ფართო შეშფოთებას ხელოვნური ინტელექტის შესახებ, რომელიც მერყეობს ილონ მასკის გაფრთხილებებიდან, რომ ის შეიძლება გამოყენებულ იქნას როგორც „ტერორის იარაღი“, Google-ის ყოფილი აღმასრულებლის კაი ფუ ლის წინასწარმეტყველებამდე, რომ 15 წელიწადში ავტომატიზაციამ შესაძლოა ადამიანის სამუშაოების 40% ჩაანაცვლოს.
Grammarly-მ ასევე უნდა გაუძლოს AI-ზე მომუშავე წერაში დახმარების ახალ პროგრამებთან, მათ შორის Microsoft Editor-თან კონკურენციას. კომპანია ცდილობს კონკურენციას ახალი პროდუქტებით გაუსწროს, მათ შორის დესკტოპის და Grammarly for Developers-ის პროგრამით და ასევე Samsung-თან პარტნიორობით.
Grammarly იმედოვნებს, რომ ბიზნეს სამყაროსთვის სუფთა წერა განსაკუთრებით სასარგებლო გახდება უფრო მოქნილ სამუშაო შეთანხმებებზე გადასვლის ფონზე. გასულ თვეში გამოქვეყნებული Harris Poll-ის კვლევის მიხედვით, რომელიც Grammarly-ის დაკვეთით ჩატარდა, ცუდი კომუნიკაცია ამერიკულ კომპანიებს ყოველწლიურად შესაძლოა $1,2 ტრილიონი დაუჯდეთ.
Bloomberg-ის ორიგინალური სტატიის ავტორი: ბლეიკ შმიდტი და ალექსანდრ საზანოვი