აშშ-ის "დაავადებათა კონტროლისა და პრევენციის ცენტრების" (CDC) აცხადებს, რომ Covid-19 ვაქცინის "ბუსტერის" მიღების შემდეგ ადამიანებს უმეტესად მსუბუქიდან ზომიერამდე რეაქცია განუვითარდათ.
ფედერალური მონიტორინგის სისტემაში "ბუსტერის" დაახლოებით 22 191 მიმღები დარეგისტრირდა. საერთო ჯამში, 71% ინექციის ადგილზე ტკივილს გრძნობდა, 56%-მა მიუთითა დაღლილობაზე, ხოლო 43%-მა აღნიშნა, რომ მე-3 დოზის შემდეგ თავი სტკიოდათ. მონაცემები აღრიცხულია ვაქცინაციიდან 7 დღის განმავლობაში.
მათ შორის, ვისი რეაქციაც მონიტორინგის სისტემაში დაფიქსირდა, დაახლოებით 1.8% აღნიშნავს, რომ მათ სამედიცინო დახმარება მოითხოვეს, 13 ადამიანს ჰოსპიტალიზაცია დასჭირდა. სამედიცინო დახმარების ტიპი მონაცემებში მითითებული არ არის.
"ბუსტერის" მიღების შედეგად გამოწვეული გვერდითი მოვლენების სიხშირე და ტიპი მე-2 დოზით აცრის შემთხვევაში განვითარებული მოვლენების მსგავსია და ზოგადად ხასიათდება როგორც მსუბუქი ან ზომიერი",- თქვა CDC-ის დირექტორმა როშელ ვალენსკიმ თეთრი სახლის კორონავირუსის სამუშაო ჯგუფის ბრიფინგზე.
აშშ-ის "დაავადებათა კონტროლისა და პრევენციის ცენტრმა" გარკვეულ ჯგუფებში Covid-19-ის ვაქცინის "ბუსტერ" დოზის გამოყენებას მხარი გასულ კვირას დაუჭირა.
ასეთ ჯგუფებად განისაზღვრა 65 წლის და უფროსი ასაკის ადამიანები, პირები, რომლებიც ხანგრძლივად იმყოფებიან სამედიცინო დაწესებულებებში, ასევე 50-64 წლის ქრონიკული დაავადებების მქონე ადამიანები და 18-64 წლის პირები, ვისაც სამუშაოს თავისებურების გამო, ინფიცირების მაღალი რისკი აქვთ. მათ დამატებითი დოზის გაკეთება მე-2 დოზით აცრიდან ექვსთვიანი ინტერვალით შეუძლიათ. "ბუსტერად" გამოყენებული იქნება Pfizer/BioNTech-ის ვაქცინის ერთი დოზა.
დელტა შტამის გავრცელების გამო, "ბუსტერ" დოზის გამოყენება უკვე არაერთმა ქვეყანამ დაიწყო. სამედიცინო ჟურნალ New England Journal of Medicine-ში გამოქვეყნებულმა კვლევამ აჩვენა, რომ Pfizer-ის ვაქცინის მესამე დოზა 60 წელს გადაცილებულ ადამიანებში კოვიდთან დაკავშირებული მძიმე ავადმყოფობის რისკს დრამატულად ამცირებს.
საქართველოში მე-3, ე.წ. "ბუსტერ" დოზის გამოყენება ჯერჯერობით დაშვებული არ არის.
Bloomberg-ის ორიგინალური სტატიის ავტორი: ანუშრი დეივი