აშშ-ის “სურსათისა და წამლის ადმინისტრაციის” (FDA) მიერ ამერიკული ბიოტექნოლოგიური კომპანია Biogen-ის ალცჰაიმერის მედიკამენტის დამტკიცების შემდეგ, ინვესტორები იმედოვნებენ, რომ კომპანიის პარტნიორი, იაპონური ფარმაცევტული კომპანია Eisai მსგავსი წარმატების მიღწევას შეძლებს. Aduhelm-ის შემდეგ, კომპანია პრეპარატ BAN2401-ის დამტკიცების მოპოვებას შეეცდება.
მედიკამენტები მოქმედებენ ბეტა ამილოიდების ცილებზე, რომლებიც აზიანებენ თავის ტვინს და იწვევს ალცჰაიმერის დაავადებას.
დიდი ხნის განმავლობაში მეცნიერებს მიაჩნდათ, რომ დაავადების სამკურნალოდ მთავარი იყო ცილების დაგროვებისთვის ხელი შეეშალათ. ფარმაცევტულმა კომპანიებმა ექსპერიმენტული ნივთიერებების შექმნაზე მილიარდობით დოლარი დახარჯეს, თუმცა დაავადების პროგრესირების შეჩერებას ვერც ერთი ახერხებდა. Aduhelm აღმოჩნდა პირველი ასეთი წამალი, რომელიც ბაზარზე დაავადებასთან სამკურნალოდ გამოვა.
ამჟამად Eisai პრეპარატ BAN2401-ზე (ასევე ცნობილია, როგორც lecanemab) ორ კვლევას ატარებს. დაავადების ადრეულ სტადიაზე მყოფი პაციენტების კვლევის შედეგები მომავალ წელს გამოქვეყნდება.
იაპონურმა ფარმაცევტულმა კომპანიამ Biogen-თან ერთად, 2014 წელს ალცჰაიმერთან დაკავშირებული რამდენიმე პრეპარატი შეიმუშავა. 2017 წელს, Eisai-მ განავრცო ხელშეკრულება და მასში მოექცა პრეპარატი Aduhelm-ი, რომელიც პირველად ცნობილი იყო, როგორც aducanumab-ი.
კონტრაქტის მიხედვით, აზიაში (ჩინეთისა და სამხრეთ კორეის გარდა) Aduhelm-ის გაყიდვაზე პასუხისმგებელია Eisai, დანარჩენ ქვეყნებში, მათ შორის, აშშ-სა და ევროპაში პრეპარატს Biogen-ი გაყიდის.
Eisai-ს აქციები დღეს დღიური ლიმიტით 19%-ით გაიზარდა, Biogen-ის აქციები კი აშშ-ში ვაჭრობაში 38.3%-იანი ზრდის შემდეგ, $395,85-ით დაიხურა.
Bloomberg-ის ორიგინალური სტატიის ავტორები: ლიზა დუ და გრეის ჰუანგი