მაისში ქუთაისის აეროპორტი რეკორდული რაოდენობის მგზავრსა და რეისს მოემსახურა

საქართველოს აეროპორტების გაერთიანების ინფორმაციით, 2023 წლის მაისში, პანდემიამდელ, 2019 წლის ანალოგიურ პერიოდთან შედარებით, ქუთაისის საერთაშორისო აეროპორტში მგზავრთნაკადის რეკორდული მაჩვენებელი დაფიქსირდა. კერძოდ, გასულ თვეში აეროპორტით 126 864-მა მგზავრმა ისარგებლა. 2019 წლის მაისი კი ეს მაჩვენებელი 64 745-ს შეადგენდა.

მგზავრთნაკადის გარდა, მაისში პანდემიამდელთან შედარებით, რეკორდული იყო ავიარეისების რაოდენობაც. 2019 წლის მაისში აეროპორტში 210 რეისი შესრულდა. 2023 წლის ანალოგიურ პერიოდში კი რეისების რაოდენობა 80%, 378-მდე გაიზარდა.

რაც შეეხება იანვარ-მაისის მონაცემებს, აეროპორტების გაერთიანების ინფორმაციით, პანდემიამდელ პერიოდთან შედარებით, ქუთაისის საერთაშორისო აეროპორტში მგზავრთნაკადის რაოდენობის კუთხით, სტაბილური ზრდა დაფიქსირდა. 5 თვეში აეროპორტი 502 323 მგზავრს მოემსახურა, რაც 2019 წლის ანალოგიური პერიოდის მაჩვენებელს 74%-ით აღემატება.

5 თვეში ისტორიულ მაქსიმუმს მიუახლოვდა რეისების რაოდენობაც. ქუთაისის საერთაშორისო აეროპორტი 1 591 რეისს მოემსახურა, რაც პანდემიამდელ პერიოდთან შედარებით, 66%-ით მეტია.

აეროპორტების გაერთიანების ინფორმაციით, ამ ეტაპისთვის, ქუთაისის საერთაშორისო აეროპორტიდან 5 ავიაკომპანია ოპერირებს. რეისები 17 ქვეყნის 34 მიმართულებით სრულდება.

შეგახსენებთ, 2023 წლის პირველი ივნისიდან ავიაკომპანია Wizz Air-მა ქუთაისის საერთაშორისო აეროპორტში მესამე ბაზირებული ხომალდი დააბრუნა და რეგულარული რეისებს მადრიდის, ბრიუსელის, ფრანკფურტის, ჰამბურგისა და პოზნანის მიმართულებით ასრულებს. 4 ივნისიდან კი ყაზახურმა დაბალბიუჯეტურმა ავიაკომპანია FlyArystan-მა ალმათი-ქუთაისი-ალმათის მიმართულება დაამატა.

2023 წლის პირველ დეკემბერს ქუთაისის საერთაშორისო აეროპორტს Wizz Air-ის მეოთხე ბაზირებული ხომალდი და კოპენჰაგენის მიმართულება დაემატება.