LIVE

აპრილში საქართველოში წლიურმა ინფლაციამ 2.7% შეადგინა - საქსტატი

03 მაი 202311:16
3 წუთის საკითხავი
clock clock 304
აპრილში საქართველოში წლიურმა ინფლაციამ 2.7% შეადგინა - საქსტატი

სტატისტიკის ეროვნული სამსახურის მონაცემებით, 2023 წლის აპრილში, წინა თვესთან შედარებით, საქართველოში 0.7%-იანი დეფლაცია, ანუ სამომხმარებლო ფასების საერთო დონის კლება დაფიქსირდა, ხოლო წლიური ინფლაციის მაჩვენებელმა 2.7% შეადგინა.

რაც შეეხება საბაზო ინფლაციას, აღნიშნულმა აპრილში, გასული წლის შესაბამის პერიოდთან შედარებით, 4.7% შეადგინა, ხოლო თამბაქოს გარეშე წლიური საბაზო ინფლაციის მაჩვენებელი ასევე 4.7%-ით განისაზღვრა.

წლიური ინფლაციის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე:

სურსათი და უალკოჰოლო სასმელების ჯგუფში ფასები გაიზარდა 5.9%-ით. კერძოდ, ფასები მომატებულია შემდეგ ქვეჯგუფებზე:

  • ბოსტნეული და ბაღჩეული - ფასების წლიური ზრდა 10.8%;
  • რძე, ყველი და კვერცხი - 10.1%;
  • პური და პურპროდუქტები - 9.2%;
  • ხორცი და ხორცის პროდუქტები - 9.1%;
  • მინერალური და წყაროს წყალი, უალკოჰოლო სასმელები და ნატურალური წვენები - 8.7%;
  • თევზეული - 6.7%;
  • ყავა, ჩაი და კაკაო - 3.4%;
  • შაქარი, ჯემი და სხვა ტკბილეული - 1.5%;
  • ფასები შემცირდა ზეთსა და ცხიმზე - 14.8%;
  • ფასები ასევე შემცირდა ხილსა და ყურძენზე - 4.4%.

საცხოვრებელი, წყალი, ელექტროენერგია, აირის ჯგუფში დაფიქსირდა ფასების 10.3%-იანი მატება. ფასები გაიზარდა ქვეჯგუფებზე: ფაქტიური გადასახადი საცხოვრებელზე (31%) და საცხოვრებლის მიმდინარე მოვლა და შეკეთება (4.6%).

ტრანსპორტის ჯგუფში ფასები შემცირდა 12.9%-ით. ფასები შემცირებულია პირადი სატრანსპორტო საშუალებების ექსპლუატაციაზე (-20.5%) და სატრანსპორტო საშუალებების შეძენაზე (-2.8%). ამასთან, ფასები გაიზარდა სატრანსპორტო მომსახურებაზე (8%).

ჯანმრთელობის დაცვის ჯგუფში ფასები შემცირდა 7.9%-ით. ფასების კლება დაფიქსირდა სამედიცინო პროდუქციის, აპარატურისა და მოწყობილობის ქვეჯგუფზე (-18.7%). ამასთან, ფასები გაიზარდა ამბულატორიულ სამედიცინო მომსახურებაზე (11.3%) და საავადმყოფოების მომსახურებაზე (7.6%).

საქსტატის მონაცემებით, 2023 წლის მარტში წლიურმა ინფლაციამ 5.3% შეადგინა.