უძრავი ქონების ბაზარზე საცხოვრებელი ბინების გაძვირების ტენდენციის გაგრძელების მიუხედავად, ეროვნული ბანკი მიიჩნევს, რომ სექტორში დღეს არსებული ვითარება ჯანსაღია და ე.წ. ფასების ბუშტის ნიშნები არ შეიმჩნევა.
როგორც სებ-ის SME და კორპორატიული საკრედიტო რისკების განყოფილების მთავარმა სპეციალისტმა „ბიზნეს ფორმულას“ განუცხადა, ამჟამად ფასების ზრდას ფუნდამენტურ მაკროეკონომიკურ მაჩვენებლებზე დაფუძნებული მოთხოვნა განაპირობებს, შესაბამისად, ამ მიმართულებით რისკები არ შეიმჩნევა.
„ჩვენი კვლევის ერთ-ერთი მიზანი იყო, გამოგვეკვლია რამდენად ფუნდამენტური საფუძვლები აქვს უძრავი ქონების ბაზარზე ფასების ზრდას. კვლევის შედეგად დადგინდა, რომ ფასების ზრდას, რაც თავის მხრივ, მოთხოვნის ზრდითაა განპირობებული, მნიშვნელოვანი ფუნდამენტური ეკონომიკური საფუძვლები აქვს. ესაა მაღალი ეკონომიკური ზრდა, ფულადი გზავნილების ზრდის ტენდენცია, უცხოელების და მიგრანტების გააქტიურება უძრავი ქონების ბაზარზე. ეს ყველაფერი გვაძლევს იმის თქმის საშუალებას, რომ ფასების ზრდა გამოწვეულია ეკონომიკური ფაქტორებიდან გამომდინარე. ე.წ. ფასების ბუშტის წარმოქმნა ხდება იმ შემთხვევაში, როდესაც მოთხოვნის ზრდა რაიმე კონკრეტულ ფუნდამენტურ ფაქტორებზე არაა მიბმული. დღეს ეს ვითარება საქართველოს უძრავი ქონების ბაზარზე არ გვაქვს. ამიტომ ჩვენ ვერ ვხედავთ ამჟამად ე.წ ფასების ბუშტის ნიშნებს“, - განაცხადა ირაკლი ისაკაძემ.
ეროვნული ბანკის კვლევის თანახმად, საქართველოში დეველოპერულ კომპანიებს უძრავ ქონებაზე ფასის მატების საშუალებას აძლევს გაზრდილი მოთხოვნა, როგორც რეზიდენტი, ისე არარეზიდენტი პირების მხრიდან. კვლევაში, სადაც უძრავი ქონების დეველოპმენტის სექტორის 2022 წლის 11 თვის მონაცემებია გაანალიზებული, აღნიშნულია, რომ ფასის ზრდის კიდევ ერთი ფაქტორი გაძვირებულია მშენებლობაა.
ამასთან, კვლევის მიხედვით, 2022 წლის 11 თვის მონაცემები აჩვენებს, რომ თბილისში სახლის/ბინის გაყიდვები ძირითადად (86%) საქართველოს მოქალაქეებზე მოდიოდა, რუსეთის მოქალაქეების წილი კი 2.5% იყო. რაც შეეხება ბათუმს, გაყიდული ბინების 61.8% საქართველოს მოქალაქეებზე მოდის, 11.2% კი რუსეთის მოქალაქეებზე.