როდის შესრულდება აშშ-საქართველოს შორის პირდაპირი ფრენები? - აეროპორტების გაერთიანების პასუხი

"საქართველოს აეროპორტების გაერთიანების" დირექტორი, თამარ არჩუაძე აცხადებს, რომ საქართველოსა და აშშ-ს შორის პირდაპირი ფრენების დანიშვნა უახლოეს მომავალში არ იგეგმება.

როგორც თამარ არჩუაძე "ბიზნეს ფორმულასთან" აღნიშნავს, ფრენების დასაწყებად მხოლოდ რომელიმე კომპანიის მზაობა საკმარისი არ არის.

"აშშ-ში ფრენების დაწყება საკმაოდ კომპლექსური საკითხია. ამისთვის მზად უნდა იყოს არა მხოლოდ ავიაკომპანია, არამედ მთლიანად ქვეყანაც. უნდა ჩატარდეს აშშ-ს საავიაციო ხელისუფლების საერთაშორისო აუდიტი. შესაბამისად, ეს არის საკმაოდ გრძელვადიანი პროცესი და ამ ეტაპზე ეს პროცესი არ დაწყებულა",- აცხადებს თამარ არჩუაძე.

მიმდინარე წლის მაისში, "ეარ ჯორჯიას" დამფუძნებელმა, გიორგი კოდუამ განაცხადა, რომ ორ ქვეყანას შორის ფრენები მიმდინარე წლის ბოლოს დაიწყებოდა, რასაც თამარ არჩუაძე არ ადასტურებს. 

მანამდე საქართველოში ამერიკის სავაჭრო პალატის პირველმა ვიცე-პრეზიდენტმა, ირაკლი ბაიდაშვილმა "ბიზნეს ფორმულას" განუცხადა, რომ აშშ-სა და საქართველოს შორის პირველი საცდელი ფრენა, შესაძლოა, 2022 წლის ბოლოს ან 2023 წლის დასაწყისში შესრულდეს.

ამასთან, 2019 წელს, საქართველო-აშშ-ს შორის პირდაპირი ფრენების საკითხზე მოლაპარაკებებისთვის, ეკონომიკისა და მდგრადი განვითარების მაშინდელი მინისტრი, ნათია თურნავა სამინისტროს დელეგაციასთან ერთად აშშ-ში გაემგზავრა, სადაც ორი წამყვანი ამერიკული ავიაკომპანიის, Delta Air Lines-ისა და United airlines-ის წარმომადგენლებს შეხვდა.