რუსეთის სახელმწიფო კომპანია Rosatom-მა ეგვიპტის პირველი ატომური ელექტროსადგურის მშენებლობა დაიწყო. ჩრდილოეთ აფრიკის ქვეყანა აბალანსებს კავშირებს კრემლთან და დასავლელ მოკავშირეებთან, რომლებმაც მოსკოვს სანქციები დაუწესეს უკრაინაში ომის გამო.
Rosatom-ის განცხადებაში ნათქვამია, რომ სამუშაოები დაიწყო ოთხი 1200 მეგავატიანი სიმძლავრის ელექტროსადგურებიდან პირველზე, რომლებიც აშენდება ელ დაბააში, კაიროს ჩრდილო-დასავლეთით. კომპანია მსოფლიოში ატომური საწვავის და რეაქტორების უდიდესი მიმწოდებელია. განცხადების თანახმად, Rosatom-ი ატომურ საწვავს მიაწვდის ოთხივე რეაქტორს.
რუსეთს ეგვიპტეში ფართომასშტაბიანი ენერგეტიკული პროექტების განხორციელების ისტორია აქვს. ეს აშშ-ის პოლიტიკური, სამხედრო და ეკონომიკური გავლენის გამოწვევის უფრო ფართო ძალისხმევის ნაწილია.
ეგვიპტემ რუსეთთან უფრო ძლიერი ეკონომიკური კავშირები განავითარა მას შემდეგ, რაც ელ-სისი პრეზიდენტი გახდა 2014 წელს, ამავდროულად ინარჩუნებს ისტორიულ კავშირებს დასავლეთის პარტნიორებთან.
მიმდინარე წელს მან მონაწილეობა მიიღო სანქტ-პეტერბურგის საერთაშორისო ეკონომიკურ ფორუმში და იყიდა მნიშვნელოვანი რაოდენობით ხორბალი რუსეთიდან. იმავდროულად, ისრაელთან ხელი მოაწერა შეთანხმებას ევროკავშირში გაზის გაყიდვის გაზრდის შესახებ, რადგან ბლოკი ცდილობს შეამციროს დამოკიდებულება მოსკოვიდან ენერგიის იმპორტზე.
რუსეთის პრეზიდენტი ვლადიმერ პუტინი და მისი ეგვიპტელი კოლეგა აბდელ-ფატაჰ ელ-სისი ესწრებოდნენ რეაქტორების მშენებლობაზე შეთანხმების ხელმოწერას ჯერ კიდევ 2017 წელს, როდესაც ღირებულება დაახლოებით $30 მილიარდად იყო შეფასებული, რომლის უმეტესი ნაწილი მოსკოვის სესხით უნდა დაფინანსებულიყო.
Rosatom-ის პროექტი შეჩერდა მას შემდეგ, რაც 2015 წელს რუსული ავიალაინერის დაბომბვის შედეგად 224 დამსვენებელი დაიღუპა. ორ ქვეყანას შორის ფრენები მხოლოდ გასულ წელს განახლდა, რაც პოზიტიური მოვლენა იყო ეგვიპტის ტურისტული ინდუსტრიისთვის.
რუსეთის შეჭრა უკრაინაში და სანქციები ნაკლებად შეაფერხებს საერთაშორისო ინტერესს კომპანიის ტექნოლოგიების მიმართ. ეგვიპტის გარდა, კრემლის მიერ კონტროლირებადი კომპანია კონფლიქტის დაწყების დღიდან უნგრეთსა და მიანმარში პროექტების პოპულარიზაციას ახდენს.
2020 წელს Rosatom-მა განაცხადა, რომ აირჩია სამი ეგვიპტური კომპანია, რათა დაეხმარონ ქარხნის მშენებლობაში ხმელთაშუა ზღვის სანაპიროზე.
Bloomberg-ის ორიგინალური სტატიის ავტორი: მირეტ მაგდი