ჩრდილოეთ მაკედონიის მთავრობა მხარს უჭერს შეთანხმებას, რომელიც მოაგვარებს ბულგარეთთან მიმდინარე კონფლიქტს და კარს გაუხსნის ევროკავშირის წევრობის მოლაპარაკებებს.
სოციალისტი პრემიერ-მინისტრი დიმიტარ კოვაჩევსკი შეხვდა სამთავრობო კოალიციის პარტნიორებს, რათა განეხილათ საფრანგეთის წინადადება. ის მიზნად ისახავს სოფიასა და სკოპიეს შორის დაძაბული ურთიერთობების დაძლევას ჩრდილოეთ მაკედონიაში ენის, ისტორიისა და ეთნიკური ბულგარელების უფლებებთან დაკავშირებით.
კოვაჩევსკიმ განაცხადა, რომ “წინადადება განიხილება მყარ საფუძვლად სერიოზული, პასუხისმგებელი და ამბიციური პოზიციის ასაშენებლად იმ შესაძლებლობებთან დაკავშირებით, რომლებიც იხსნება ჩვენი ქვეყნისთვის”.
მთავრობას შეეძლება იმოქმედოს პარლამენტის თანხმობის გარეშე. თუმცა, საფრანგეთის წინადადება ადგენს გაწევრიანების მოლაპარაკებების დაწყების პირობებს, რაც გულისხმობს კონსტიტუციის ცვლილებების აუცილებლობას. ეს კი პარლამენტის უმრავლესობის ორი მესამედის თანხმობას მოითხოვს.
ამგვარად, მთავრობამ შეიძლება გადაწყვიტოს გაწევრიანების პროცესის დაწყება, რასაც ჩვეულებრივ დაახლოებით ერთი წელი სჭირდება, შემდეგ კი ნებისმიერ საკონსტიტუციო ცვლილებას განიხილავს.
მთავარი ოპოზიციური პარტიის VMRO-DPMNE-ის ლიდერმა კრისტიან მიკოსკიმ საფრანგეთის შეთავაზებას “სირცხვილი” უწოდა და მოსახლეობას შეთანხმების წინააღმდეგ პროტესტისკენ მოუწოდა. ყოფილმა საგარეო საქმეთა მინისტრმა ნიკოლა დიმტროვმა ასევე განაცხადა, რომ ეწინააღმდეგება შეთანხმებას, რადგან ის მოითხოვს კონსტიტუციის ცვლილებას გაწევრიანების მოლაპარაკებების ოფიციალურად დაწყებამდე.
საფრანგეთის პრეზიდენტმა ემანუელ მაკრონმა მადრიდში ნატოს სამიტზე გამართულ პრესკონფერენციაზე მიანიშნა, რომ კომპრომისი გარდაუვალია და დარწმუნებულია, რომ იპოვეს “გამოსავალი, რომელიც დააკმაყოფილებს ორივე მხარის გრძნობებს”.
“ჩრდილოეთ მაკედონია და ბულგარეთი, საფრანგეთის მხარდაჭერით, ახლოს არიან შეთანხმებასთან, რომელიც ითვალისწინებს ერთმანეთის ინტერესებს და შეშფოთებას”, - დაწერა Twitter-ზე ევროკომისიის პრეზიდენტმა ურსულა ფონ დერ ლაიენმა კოვაჩევსკისთან სატელეფონო საუბრის შემდეგ.
ჩრდილოეთ მაკედონია დასავლეთ ბალკანეთის ერთ-ერთი ქვეყანაა, რომელიც წლების განმავლობაში ელოდა ევროკავშირში გაწევრიანებას.
დასავლეთ ბალკანეთის პერსპექტივები ევროკავშირში კვლავ მოექცა ყურადღების ცენტრში უკრაინაში რუსეთის ომის გამო, რამაც აიძულა კიევი, ისევე როგორც ახლომდებარე მოლდოვა და საქართველო, ევროკავშირში გაწევრიანებაზე განაცხადი ოფიციალურად შეეტანათ. უკრაინამ და მოლდოვამ კანდიდატის სტატუსი მიიღეს, საქართველომ - არა.
ალბანეთის ევროკავშირში გაწევრიანება დაკავშირებულია ჩრდილოეთ მაკედონიასთან, ამიტომ სკოპიეს გაწევრიანების გეგმის პროგრესი ასევე განბლოკავს ტირანას წევრობას.
გასულ კვირას ბულგარეთმა გადალახა სოფიას ეფექტური ვეტო ჩრდილოეთ მაკედონიის ევროკავშირში გაწევრიანებაზე მოლაპარაკებების დასაწყებად საფრანგეთის წინადადებაზე კენჭისყრით.
თუმცა, ბულგარეთი დაჟინებით მოითხოვდა ჩრდილოეთ მაკედონიაში ბულგარელების სათანადო კონსტიტუციური დაცვის აუცილებლობას.
ბულგარეთის ნაბიჯებმა გაურთულა ცხოვრება ჩრდილოეთ მაკედონიის პრემიერ-მინისტრს, რომელმაც გასულ კვირას საფრანგეთის შეთავაზებულ კომპრომისს “მიუღებელი” უწოდა.
კოვაჩევსკიმ თქვა, რომ საბოლოო წინადადება, რომელიც მიმდინარე კვირაში იყო წარმოდგენილი, იცავს ჩრდილოეთ მაკედონიის იდენტობის საკითხებს, მათ შორის მაკედონიურ ენას და პირობა დადო, რომ მთელი პროცესი გამჭვირვალე იქნება.
“ჩვენი მომავლის შესახებ გადაწყვეტილება მიიღება ერთობლივად, ქვეყნის და ყველა მოქალაქის სტრატეგიული ინტერესების შესაბამისად”, - განაცხადა კოვაჩევსკიმ.