შვეიცარიამ რუსეთიდან ოქროს იმპორტი უკრაინაში შეჭრის შემდეგ პირველად განახორციელა, რაც მიუთითებს ინდუსტრიის პოზიციის შესაძლო შერბილებაზე ძვირფას ლითონებთან მიმართებაში.
შვეიცარიის ფედერალური საბაჟო ადმინისტრაციის ინფორმაციით, მაისში რუსეთიდან შვეიცარიაში 3 ტონაზე მეტი ოქრო გაიგზავნა.
შვეიცარიის ოქროს გადამამუშავებელი ინდუსტრიის ასოციაციის მტკიცებით, მათ წევრებს გასულ თვეში რუსეთიდან ოქრო არ შემოუტანიათ. ეს განცხადება აჩენს კითხვებს იმის შესახებ, თუ ვინ იყიდა ქვეყნის ძვირფასი ლითონები.
"„მიუხედავად იმისა, რომ შვეიცარიის კანონმდებლობა და სანქციები არ კრძალავს რუსული ოქროს იმპორტს შვეიცარიაში, ASFCMP სურს გაიმეოროს, რომ საეჭვო ოქროს ადგილი არ არის შვეიცარიაში", - ნათქვამია ძვირფასი ლითონების მწარმოებელთა და მოვაჭრეთა შვეიცარიის ასოციაციის განცხადებაში.
გასულ თვეში მთავარ გადამამუშავებელ ჰაბში ოქროს იმპორტის დაახლოებით 2% რუსეთზე მოდიოდა. ეს ასევე შეიძლება ნიშნავდეს რუსული ბუილონის აღქმის ცვლილებას, რომელიც უკრაინაში შეჭრის შემდეგ ტაბუდადებული გახდა. ქარხნების უმეტესობამ უარი თქვა რუსეთიდან ახალი ოქროს მიღებაზე მას შემდეგ, რაც ლონდონის ბუილონის ბაზრის ასოციაციამ ამოიღო აკრედიტებულთა სიიდან.
მიუხედავად იმისა, რომ ეს განიხილებოდა, როგორც დე ფაქტო აკრძალვა ახალი რუსული ოქროს გაყიდვაზე ლონდონის ბაზარზე, წესები არ კრძალავს რუსული ლითონის გადამუშავებას სხვა გადამამუშავებელ ქარხნებში. შვეიცარიაში არის ოთხი ძირითადი გადამამუშავებელი ქარხანა, რომლებიც ერთად ამუშავებენ მსოფლიო ოქროს ორ მესამედს.
მარტში, სულ მცირე ორმა მსხვილმა გადამამუშავებელმა ქარხანამ უარი თქვა რუსული ბუილონის დნობაზე, მიუხედავად იმისა, რომ ბაზრის წესები მათ ამის საშუალებას აძლევს. სხვებმა, როგორიცაა Argor-Heraeus-ი, განაცხადეს, რომ მიიღებენ რუსეთში გადამუშავებულ პროდუქტებს 2022 წლამდე, თუ მათ აქვთ დოკუმენტები, რომლებიც ადასტურებენ, რომ ეს არ მოიტანს ფინანსურ სარგებელს რუსეთის ფიზიკური და იურიდიული პირებისთვის.
შვეიცარია აპრილიდან ახორციელებს მცირე რაოდენობით პალადიუმის იმპორტს რუსეთიდან, რომელიც ლითონის უმსხვილესი მწარმოებელია.
Bloomberg-ის ორიგინალური სტატიის ავტორი: ედი სპენსი