ტანკერების გამოყენებით ლოგისტიკურად სარისკო და ძვირადღირებული ნედლი ნავთობის გადაზიდვა აჩვენებს, რომ სულ მცირე ერთი ჩინელი მყიდველი მზად არის გადადგას უჩვეულო ნაბიჯი აღმოსავლეთ რუსეთიდან აზიაში ნავთობის ნაკადის შესანარჩუნებლად.
მყიდველები იყენებენ კრეატიულ გზებს, რადგან უფრო მეტი გემთმფლობელი ერიდება რუსულ ნავთობს ფინანსური სანქციების შესაძლო შედეგების გამო. მცირე გემები გამოიყენება რუსეთის კოზმინოს პორტსა და სამხრეთ კორეაში, იოსუს წყლებს შორის, სადაც ტვირთები გემიდან გემზე გადადის სუპერტანკერებზე ჩინეთში მოგზაურობის შემდეგი ეტაპისთვის.
ეს პროცესი უჩვეულოა რუსული ESPO-ს მარკის ნედლი ნავთობისთვის, რომელიც ჩვეულებრივ იტვირთება მცირე ტანკერებზე ჩინეთში ხუთდღიანი მოგზაურობისთვის. მიუხედავად იმისა, რომ ეს ზრდის გადაზიდვის საერთო დროსა და ღირებულებას, პრაქტიკა უფრო გავრცელებული ხდება, რადგან გემთმფლობელები და მყიდველები პრიორიტეტს ანიჭებენ მცირე გემებით მზა მიწოდებას კოზმინოს პორტიდან ნავთობის მცირე პარტიებით გადასატანად.
რუსული ნავთობის ყიდვის მსურველები მსოფლიო საორიენტაციო ფასებთან შედარებით დიდ ფასდაკლებას მიიღებენ, რადგან სხვები ერიდებიან მოსკოვთან გარიგებებს უკრაინაში ომის გამო.
იაფმა ნავთობმა მიიპყრო ისეთი ძირითადი მომხმარებლების ყურადღება, როგორიცაა ჩინეთი და ინდოეთი, რათა განაგრძონ იმპორტი OPEC+-ის მწარმოებლიდან საერთაშორისო ვითარებისა და მზარდი ლოგისტიკური და ფინანსური დაბრკოლებების მიუხედავად.
მიმდინარე თვეში ჩინეთი მიიღებს ESPO-ს თითქმის ყველა პარტიას. ტვირთი ჩვეულებრივ ტრანსპორტირდება პირდაპირ დატვირთვიდან მიმღებ პორტებამდე Aframax-ისა და Long Range 2-ის ტანკერებზე.
გემების ბროკერების თქმით, მცირდება გემთმფლობელთა და მზღვეველთა რიცხვი, რომელთაც სურთ ტვირთის გადატანა რუსეთის აღმოსავლეთიდან და დასავლეთიდან. ამან შექმნა ლოგისტიკური გამოწვევა მწარმოებლებისთვის და მყიდველებისთვის, რადგან ისინი მუშაობენ ნაკლები ტანკერებით და უნდა განიხილონ, თუ როგორ გამოიყენონ ხელმისაწვდომი გემების ტიპები.
მიუხედავად იმისა, რომ გემიდან გემზე მცირე ზომის ტანკერებზე გადაზიდვები ჩვეულებრივი მოვლენაა ისეთი ნედლი ნავთობისთვის, როგორიცაა ურალის ნავთობი, რომელიც სულ უფრო მეტად მიედინება ბალტიის ზღვიდან აზიაში, ეს თითქმის უჩვეულოა ESPO-სთვის, რაც გამოწვეულია აზიის მსხვილ კლიენტებზე ტვირთის მიტანისთვის საჭირო მოკლე მარშრუტით.
გემთმფლობელები, როგორიცაა Cosco Shipping-ი და რუსული Sovcomflot-ი, რუსული ნავთობის მნიშვნელოვანი მოცულობის გადაზიდვას ახორციელებენ ბალტიის ზღვის პორტებიდან. ბოლო კვირების განმავლობაში, ისეთმა კომპანიებმა, როგორიცაა Maersk-ი, შეაჩერეს გარიგებები რუსეთთან, ხოლო სხვები, ევროკავშირისგან მოსალოდნელი მკაცრი რეგულაციებისა და ნავთობის პოტენციური აკრძალვის გამო, მოლოდინის რეჟიმზე გადავიდნენ.
Bloomberg-ის ორიგინალური სტატიის ავტორი: სერენა ჩონგი