სურსათის სააგენტომ 472 კგ. „ქინდერის“ საეჭვო პარტიები დალუქა

სურსათის ეროვნულმა სააგენტომ საქართველოში იმპორტირებული  „ქინდერის“ საეჭვო პარტიები დალუქა და მომხმარებლებს მოუწოდებს, უკვე შეძენილი შოკოლადი არ გამოიყენონ.

სააგენტოს ინფორმაციით, შეტყობინება რომელიც Ferrero-ს მიერ წარმოებული სხვადასხვა დასახელების შოკოლადის პროდუქტის Salmonella Typhimurium-ით სავარაუდო დაბინძურებას შეეხებოდა, 28 აპრილს მიიღეს. ინსპექტორებმა 29 აპრილს შეამოწმეს იმპორტიორი კომპანიის, შპს „ბადი კომპანის“ სადისტრიბუციო-სასაწყობო ობიექტი.

შემოწმებისას, სააგენტოს ზედამხედველობით დაილუქა 472 კგ. შემდეგი დასახელების შოკოლადი:

KINDER SCHOKOBONS, აღწერილობა: SCHOKOBONS KINDER; SCHOKOBONS G125X16; HANGING BAG BASE.

„სააგენტოს ზედამხედველობით, გრძელდება იმპორტიორი კომპანიის მიერ ბაზარზე განთავსებული კონკრეტული პარტიების მოკვლევა-აღრიცხვა, ამოღება/გამოთხოვა, დასაწყობება.

28 აპრილს RASFF-ის სწრაფი განგაშის სისტემით მიღებულ შეტყობინებაში მითითებული შოკოლადის პროდუქტის ერთ შემთხვევაში ვარგისიანობის ვადად განსაზღვრულია 25.07.2022.  ინსპექტირებისას დადგინდა, რომ აღნიშნული პარტია KINDER SORPRESA MAXI, აღწერილობა: KINDER SORPRESA MAXI KINDER SORPRESA MAXI K2, 5X12 PIECE CHRISTMAS, პარტიის №L301R03/09, ვარგისიანობის ვადა: 25.07.2022, სრულად არის რეალიზებული.

სააგენტომ აღნიშნულის შესახებ ინფორმაცია მყისიერად გაავრცელა. კიდევ ერთხელ მოვუწოდებთ მომხმარებელს, აღნიშნული პარტიებიდან შეძენილი პროდუქცია არ გამოიყენოს“, - აცხადებენ სურსათის ეროვნული სააგენტოში.  

შეგახსენებთ, ევროპაში, კერძოდ კი დიდ ბრიტანეთში, საფრანგეთში, გერმანიაში, ბელგიასა და სხვა ქვეყნებში სალმონელას ასობით შემთხვევა დაფიქსირდა, განსაკუთრებით 10 წლამდე ბავშვებში. სპეციალისტების განცხადებით, სავარაუდოდ, ეს დაკავშირებულია Ferrero-ს მიერ წარმოებული სხვადასხვა დასახელების „ქინდერის“ შოკოლადის პროდუქტის Salmonella Typhimurium-ით დაბინძურების ფაქტთან. აღნიშნულთან დაკავშირებით განხორციელდა სურსათის სხვადასხვა ქვეყნის ბაზრიდან გამოთხოვა, რეალიზაციის აკრძალვა და მომხმარებელთა ინფორმირება.

სურსათის ეროვნულმა სააგენტომ RASFF-ის სწრაფი განგაშის სისტემით მიმდინარე წლის 7 აპრილსაც მიიღო შეტყობინება სხვადასხვა დასახელების შოკოლადის პროდუქტებში სალმონელას სავარაუდო არსებობის შესახებ, რის შემდეგაც დაიწყო კონკრეტული პარტიის გამოვლენის პროცედურები, თუმცა, სააგენტოს ინფორმაციით, მაშინ საქართველოს სამომხმარებლო ბაზარზე არცერთი საეჭვო პარტია არ გამოვლენილა.