შვეიცარიაში დაფუძნებულმა კომპანიამ, რომელმაც Nord Stream 2 გაზსადენი ააშენა, შესაძლოა გადახდისუუნარობის შესახებ განაცხადოს. ინფორმაციას საინფორმაციო სააგენტო Reuters-ი ორ განსხვავებულ წყაროზე დაყრდნობით წერს.
გაზსადენის მფლობელ და ოპერატორ კომპანია Nord Stream 2 AG-ს აშშ-მა სანქციები გასულ კვირას, უკრაინის სეპარატისტული რეგიონების აღიარების შემდეგ დაუწესა.
Nord Stream 2 AG რუსულ სახელმწიფო კომპანია Gazprom-ს ეკუთვნის. მან $11 მილიარდიანი პროექტი გასულ წელს დაასრულა. პროექტის მიზანი რუსეთიდან გერმანიაში გაზის გაორმაგებული მოცულობის მიწოდება იყო.
წყაროებმა, რომლებმაც სააგენტოსთან ანონიმურობის დაცვის პირობით ისაუბრეს, აღნიშნეს, რომ Nord Stream 2 AG გარკვეული ვალდებულებებისგან გათავისუფლების მიზნით, კონსულტაციებს ფინანსურ მრჩეველთან გადის.
მათივე ინფორმაციით, გადახდისუუნარობის პროცესი შეიძლება ოფიციალურად შვეიცარიის სასამართლოში მიმდინარე კვირაში დაიწყოს.
Nord Stream 2 AG-მა და Gazprom-მა Reuters-თან კომენტარი არ გააკეთეს.
მილსადენი, რომელიც ბუნებრივ აირს რუსეთიდან გერმანიას აწვდის, წლების განმავლობაში იყო შეერთებული შტატებისა და ბალტიის ქვეყნების კრიტიკის სამიზნე. კრიტიკოსები ამტკიცებენ, რომ ის ზრდის ევროპის დამოკიდებულებას რუსეთის ენერგომომარაგებაზე.