საქართველოში გადმორიცხული ფულადი გზავნილები ისტორიულ მაქსიმუმზეა. ეროვნული ბანკის მონაცემებით, მიმდინარე წლის 11 თვეში უცხოეთიდან გადმორიცხულმა თანხამ $2.1 მილიარდს გადააჭარბა, რაც აღემატება როგორც პანდემიური 2020 წლის ($1.88 მილიარდი), ასევე 2019 წლის წლიურ მონაცემსაც ($1.7 მილიარდი).
11 თვეში საქართველოში ყველაზე მეტი თანხა - $371 მილიონი რუსეთიდან გადმოირიცხა; $348 მილიონს გადააჭარბა ფულადი გზავნილების მოცულობამ იტალიიდან; $258 მილიონით მესამე ადგილზე ამერიკის შეერთებული შტატებია; $220 მილიონი გადმოირიცხა საბერძნეთიდან; ხოლო ისრაელიდან გადმორიცხულმა თანხამ $169 მილიონს გადააჭარბა.
რაც შეეხება ნოემბრის მონაცემს, გასულ თვეში საქართველომ $207.3 მილიონის ფულადი გზავნილი მიიღო. ფულადი გზავნილების 39%, $80.8 მილიონი ევროკავშირის ქვეყნებზე მოდის.
TOP-5 ქვეყანა, საიდანაც ნოემბერში ყველაზე მეტი თანხები გადმოირიცხა შემდეგია:
- რუსეთი - $34 მილიონი
- იტალია - $32 მილიონი
- აშშ - $23.9 მილიონი
- საბერძნეთი - $18.9 მილიონი
- ისრაელი - $16.9 მილიონი